Merry ang Pasko

Pagkadali ra gyud sa panahon nga wala lang damha Disyembre na. Pasko na. Kini ang gihuwat seguro ilabi na sa kabataan nga naghinamhinam nga dunay regalo nga madawat.

Dili lang sa mga bata kondili apil na kadtong mga tawo nga nagpabilin ang pagbati sa usa ka bata nga mahibawo’ng makontento sa simple o yano nga kalipay.

Bitaw kaniadto manaygon kami sa among probinsiya lipay na kaayo kon makadawat og sinselyo bisan pang gukdon pa og mga iro panahon sa kagabhion.

Naghisgot naman lang gyud ta og merry ang Pasko, mao kini ang mga magtutudlo sa pampublikong tunghaan sa dakbayan sa Sugbo.

P10,000 nga malabo ang ilang pinaskohan gikan sa kagamhanan sa dakbayan sa Sugbo.

Gawas niini hatagan pa sila og singko milyones pesos nga magamit sa ilang Christmas party.

Pagkabulahan gyud sa mga teachers sa Cebu City apan sa susamang higayon murag maglaway ang taga ubang dapit, ambot lang duna ba silay susamang pinaskohan.

Makaingon man sab ang uban nga “Sana All” kay aron merry pa usab ang ilang pasko, bitaw hangyoa pud ninyo ang inyong lokal nga kagamhanan kay basin hatagan pud mo.

Matud ni Mayor Edgardo Labella nga ang angayan lang hatagan og pinaskohan ang mga magtutudlo tungod sa sakripisyo nila sa pag umol sa kinaadman sa mga bata.

Tinuod baya sad kay kon wala ang mga teachers wala may abogado, doktor ug uban pa nga nakatapos og kurso nga maoy nakapahimo kanilang tawo.

Mas nindot unta nga dili lang sa public schools kon dili apilon pud kuno ang mga private schools, matod pa sa uban.

Apan kadto nalang segurong mga tag iya sa pribadong tunghaan ang mohatag nianang pinaskohan ngadto sa ilang mga magtutudlo.

Sa pikas bahin mipahimangno ang DepEd nga himoong simple ang Christmas party ug dili mangayo og amot sa mga tinon-an.

Kon dunay mobulontaryo nga mopaambit sa ilang blessing sa Pasko mas maayo apan kon ang uban wala gyuy ikasarang dili nalang pugson inay hangpon sila ug iapil sa salo salo bisan wala kaamot kay mao kini ang tinood nga hiyas sa Pasko.