Nagbaha gyud ang mga binayloay og mga komento sa mga netizens diha sa social media mahitungod sa nagpadayong 30th Southeast Asian Games (SEA Games) nga gihimo karon didto sa Pampanga.
Samtang nagpungasi ang mga pagsaway human mabaniog sa media ang mga kapalpakan, nagpungasi sab ang pagdepensa sa mga klaro kaayong supporters ni Pres. Duterte nga ang uban migamit pa gyud og mga fake news ug fake nga mga hulagway sa mga venues dungan sa pagatake sa mainstream media nga nagbalita bahin sa mga kapalpakan ug mga reklamo.
Mismo na si Duterte pinaagi sa iyang tigpamaba nga si Salvador Panelo ang miingon nga dunay daghang sayop sa maong buhatan nga pinangulohan ni Rep. Alan Peter Cayetano sa preparasyon sa SEA Games.
Sumala pang Panelo dunay punto ang mga nanaway ug mga kritiko kay kun gitarong pa ang preparasyon wala untay mga makasaway ug moreklamo. Gani gimando pa gyud ni Duterte nga dunay himuong imbestigasyon kun nganong nahitabo kini.
Laing wala makita sa mga die hard supporters ni Duterte ug sa kadtong mga dili kadawat sa mga negatibong balita bahin sa SEA Games, mismo ang mga langyaw nga atleta ang unang nag-post sa ilang mga reklamo ug pagsaway diha sa ilang mga social media accounts ug maoy gibasehan sa mga balita sa ilang mga media sa ilang nasud ug sa dinhi.
Daghan pa gihapon ang wala makasabot sa papel sa mainstream media. Tinuod dunay daghang nanggawas nga fake news apan ang mga netizens mitoo bisan dili lehitimong media outlets gikan ang balita.
Dili mahimong diktahan ang media kun unsa ray angay nga ipagawas, positibo o negatibo kun angay ibalita, mogawas gyud na.
Bahala og sakit ug bahala’g makadaot sa nasud kun mao lang kini pamaagi aron magtarong ang mga nagmika nga opisyales nga gitahasan sa trabaho angay kining ibalita aron makorihian, pagkaanugon sa pundo sa gobiyerno kun mausik lang, dili ba?