Dihang gidawat ni Bise Presidente Leni Robredo ang hagit ni Presidente Rodrigo Duterte nga maoy mangulo sa kampanya batok sa illegal nga drugas inay magpunay og panaway, daghan ang nagtuo nga nalit-ag siya sa Malakanyang.
Kini tungod kay sukad sa sinugdan walay motuo nga seryoso si Duterte sa iyang tanyag ngadto ni Robredo. Apan bisan siya mismo kumbinsido nga usa lang sa mga kumedya sa presidente ang tanyag nga mamahimong co-chair sa Inter-Agency Committee on Anti-Illegal Drugs (ICAD), gidawat ni Robredo ang hagit dili tungod kay gusto siya niini apan tungod kay wala siyay kapilian.
Nabutang siya sa sitwasyon nga alanganin. Kun iya ng gibalibaran mas maapeke siya sa mata sa publiko tungod kay mogawas nga kutob lang siya sa panaway ug way gikatampo pagsulbad sa problema.
Ang misunod nga mga adlaw ug semana human sa pagdawat ni Robredo sa tahas nahimong kulbahinam. Mahinamon nga giatangan sa publiko unsay buhaton sa bise presidente aron magmalampuson sa trabaho nga dili siya maoy nisaad atol sa kampanya niadtong 2016. Ang administrasyon usab naghinamhinam sa sunod nilang mga lakang pagbandilyo sa tibuok nasud unsa ka palpak si Robredo tungod kay siguradong di gyud masanta ang pagkuyanap sa illegal nga drugas.
Basi sa kasaysayan sa kalibutan, wala pay nasud nga milusad og hinugtanay nga kampanya batok sa illegal nga drugas ang milampus.
Apan nasayop ang Malakanyang sa ilang pagtuo nga makuha sa ilang lit-ag si Robredo.
Kini tungod kay inay si Robredo maoy maapiki, nigawas nga ang Malakanyang maoy gikulbaan nga sila maoy mamiligro tungod sa pagpakig-alayon sa bise presidente sa United Nations aron tabangan siya pagsanta sa problema.
Nagsugod ang kakulba sa Malakanyang dihang nangayo na si Robredo sa listahan sa mga drug personalities nga target sa gobyerno sa kampanya. Dili buot ang Malakanyang nga makakuha si Robredo niining maong listahan tungod kay walay kunoy salig si Duterte niya.
Nabalaka silang ihatag ni Robredo ang kopya niini ngadto sa UN nga nagpanikad pag-imbistigar sa pasangil nga nakalapas sa tawhanong katungod sa mga gidudahang durugista ang gipasiugdahang kampanya sa gobyerno.
Si Duterte mismo miangkon nga wala siyay salig ni Robredo tungod kay posibling ipasa niini ang mga sekreto sa atong gobyerno ngadto sa iyang gihulagway nga kontra sa nasud. Dinhi naprobahan nga sukad sa sinugdanan dili gyud diay siya seryoso sa iyang tanyag kang Robredo.
Ug kun seyoso si Duterte nga masulbad ang problema sa illegal nga drugas, dili isyu ang pagpangayo ni Robredo og tabang sa ubang kanasuran tungod kay ang problema sa drugas maisip nga usa ka kalibutanong suliran nga gikinahanglan ang panagtambayong sa kalibutanong kumunidad sa mga nasud.
Walay gipili nga boundary ang maong problema. Gani ang supply sa shabu dinhi sa nasud giingong gikan sa China ug sa ubang mga nasud diin naglihok ang drug cartel.