Gidawat na ni Besi Presidente Leni Robredo ang tanyag ni Presidente Rodrigo Duterte nga maoy molingkod isip co-chairperson sa Inter-Agency Committee on Anti-Illegal Drugs ug mangulo sa kampanya batok sa illegal nga drugas.
Admitido si Robredo nga ang iyang hukom pagdawat sa maong tahas supak sa mga tambag sa kadaghanan niyang mga higala nga nagtuo nga usa ni ka lit-ag sa administrasyon batok niya. Daghan ang nagtuo nga usa ka la-ang alang ni Robredo ang gihimo ni Duterte aron manghunaw sa kapakyas pagtuman sa iyang saad nga sulbaron ang problema sa drugas sa dili pa mahuman ang iyang termino.
Sa iyang pagdawat sa katungdanan matud ni Robredo nga nasayod siya niini, apan kinahanglan niyang dawaton ang trabaho aron kuno paghunong sa patay ug pagluwas sa iyang gihulagway nga mga inosenteng biktima.
Dili ni unang higayon nga ang bise presidente sa nasud mangulo og kampanya batok sa kriminalidad. Gihimo nani kaniadto ni kanhi Presidente Fidel Ramos diin iyang gitudlo ang iyang bise presidente nga si Joseph Estrada nga maoy mangulo sa Presidential Anti-Crime Commission kon PACC.
Labihan sab ka popular sa maong kampanya kaniadto batok sa krimin nga gipangulohan sa kanhi heneral ug karon Senador Panfilo Lacson. Apan dunay kinutuban ang ilang popularidad, nahagba ang grupo tungod sa pasangil sa extra-judicial killings.
Si Duterte nasayod nga imposible niyang matuman ang saad pagbuntog sa higanting problema sa drugs sulod sa nahabiling mga tuig sa iyang termino. Ug aron paglikay sa dakong kauwawan nakakita siya og maayong lansis diha ni Robredo aron makapanghunaw ug makalikay sa pagtulisok sa publiko.
Ang katabi-an ni Robredo nga nagpunay og panaway sa kampanya sa gobyerno batok sa drugas maoy hinungdan nga nabutang siya karon sa kompromiso. Ang tahas nga iyang gidawat pagpangulo sa kampanya batok sa drugas maoy magsilbing sukdanan sa kaugmaon sa iyang politikanhong karera. Kun matagbaw ang publiko sa iyang trabaho posibling mao ni maghatud niya sa Malakanyang sa sunod nga eleksiyon. Apan kun siya mapakyas, mao sab ni mamahimong kinutuban sa iyang ambisyon nga mamahimong sunod nga presidente.
Ug sa higayon nga mapakyas si Robredo sa pagsulbad sa problema sa drugas, abswelto na si Duterte sa iyang tulobagon sa katawhan nga iyang gipasaligan panahon sa kampanya nga masulbad ang problema sulod lang gani unta sa unom ka buwan.