Mutual understanding

Di ikalimod nga kinahanglanon kaayo nato ang katabang sa tanan natong mga kawsa ug paningkamot. Apan dili sa tanang panahon nga sa maong pagpangayo og tabang walay bugti nga atong mahimo. Hinunoa, kinahanglan nga duna kitay ikahatag usab. Sa laing bahin nahimong daw sa idlas ang tanan labina kun maghisgot na kita og bugti sa bisan unsa nga gibuhat nga maayo.

Sama pananglit sa pagpatungha sa usa ka estudyante.Ang bugti nga ikahatag niya agig balos sa nagpakaubos aron lang siya molampos mao man ang pagpaningkamot nga mahatagan og kaangayan ang matag salapi nga hinagoan ug gibayad alang sa iyang pagtuon. Sanglit kini man ang kalipay sa naggasto niya, nga unta siya makalampos.

Mao nga dinhi sa among parokya, gihimo na karon sa hinayhinay nga pagpalig-on sa relasyon tali sa kura paroko ug sa mga parokyano. Nagpasabot kini og pagtambayayongay sa mga programa ug gimbuhaton dili alang sa kaugalingon lamang kondili alang sa kalambuan sa matag usa nga nalambigit sa bisan unsang kawsa.

Kun matarong lang gyud og gamit ang salapi nan, dako pa gyud unta og makab-ot ang tanan. Maingon pud sa atong panahon, nga kun gamiton nato kini sa husto, nan, mamahimong mas makahuloganon ang atong panaw padung sa kinabuhing dayon. Dili kita angayang mahadlok sa bugti sa bisan unsa gawas lamang kun kini makadaut kanato. Sama gud na sa tubig. Ang tubig libre gikan sa kahitas-an apan aron kita mo enjoy niini, kinahanglan nga mobayad usab kita sa plumber.

Gikinahanglanon lang gyud ang mosunod:

1. Hustong pagsinabtanay ug pagtambayayongay. Angay nga sabotan daan ang boundaries o limitasyon sa dili pa ilugro ang tanang mga plano.

2. Ang elemento sa Risgo kay bisan unsaon dili gyud ni mawala anaa gyud ning butanga.

3. Ang paghunahuna nga ang tanan mahimo inubanan sa hustong determinasyon sa paghatag og inspirasyon alang sa kadaghanan nga buot nimong mosunod alang sa imong kawsa.

May miduol nako dali-dali kay lagi nangutana kun managsama ba ming nagkasinabot sa presyo sa bayranan sa usa ka gipatrabaho alang sa sam-ang. Anha pako nakaamgo nga bisan kalubngan nato nagkinahanglan diay gihapon og mutual understanding.

Ang nakadaut kay managsama kaming understanding apan dili lang gyud mutual.