Padayong milingiw

Gisuwayan gyud ni Presidential Spokesperson Salvador Panelo ang pagsakay og public transport niadtong Biyernes agi og sanong sa hagit, human sa iyang pamahayag nga walay transportion crisis dinhi sa nasud.

Gikan sa Marikina paingon sa Malakanyang milanat og kapin sa tulo ka oras ang iyang biyahe. Nigikan siya og alas singko sa buntag og dul-an na sa alas nueve siyang miabot sa opisina. Sa distansiya nga 14 kilometros gikan sa Marikina paingon sa Malakanyang, ang kapin sa tulo ka oras nga biyahe taas na kaayo. Ug alang sa mga ordinaryong sumasakay kalbaryo kini nga ilang gipas-an matag-adlaw.

Walay kaso ni Panelo nga naawahi pag-abot sa iyang opisina kay labing siguro wala kini epekto sa iyang sweldo. Bisan pa og ibanan iyang suholan tungod sa iyang awahing pagreport sa trabaho dili ni makaapekto niya.

Pero ang mga yanong mamumuo siguradong magping-it sa mamahimong epekto sa ilang pagkalate sa trabaho. Namiligro pa silang mataktak sa trabaho og kanunay silang maawahi pag-abot.

Apan bisan sa tataw nga kamatuoran nga ang kasinatian mismo ni Panelo maoy nagkompirmar sa dakong suliran sa public transportation sa nasud, miinsister siya nga walay transport crisis. Matud niya nga dunay problema sa trapiko ug dili ni ikalimod apan walay krisis.

Kanus-a ba makaamgo ang mga opisyal sa gobyerno nga ang kahuot sa trapiko resulta ni sa krisis sa atong kakuwangan sa mass transport system.

Kun dunay efficient mass transport system ang nasud walay ingon niini nga problema sa trapiko. Pruweba nga ang epektibo nga mass transport maoy sulbad sa suliran mao ang sitwasyon sa ubang mga dagkong nasud sama sa China.

Ang population sa China mokabat og kapin sa usa ka bilyon, apan nganong dili ingon niini ang ilang problema sa trapiko?

Kini tungod kay efficient ang ilang mass transport system. Duna silay Bus Rapid Transit ug subway train.

Labihan ka paspas ang biyahe ug way traffic. Matag tulo ka minuto dunay train nga mohunong sa station ug sama sa gilay-on sa gibiyahi ni Panelo gikan sa Marikina paingon sa Malakanyang, tingali wala ray 10 minutos moabot siya inay nga kapin sa tulo ka oras.

Human sa kasinatian ni Panelo ug sa iyang pamahayag, tataw nga ang problema sa nasud dili lang ang krisis sa trapiko ug sa public transport kon dili apil na ang mga opisyal nga buta, bungol, ug insensitive sa kahimtang sa mga kabus nga sumasakay.

Dili gyud masulbad ang problema kun ang atong mga opisyal pabiling molingiw ug magdumili pagdawat sa kamatuoran. Atong pahinumduman ang atong mga opisyal nga ang labing unang lakang pagsulbad sa problema mao ang pagdawat niini.