Duha ka heneral
ARANGKADA - Leo Lastimosa (Banat) - October 10, 2019 - 12:00am

Si Lt. Gen. Ronnie Evangelista, superintendente sa Philippine Military Academy (PMA), wa mahilambigit sa kamatayon sa kadete nga si Darwin Dormitorio.

Bugtong niyang atraso mao nga siya ang pangu sa institusyon nga napakyas pagpanalipod sa biktima sa hazing. Apan boluntaryong ni-resign si Evangelista.

Si Police Gen. Oscar Albayalde, hepe sa Philippine National Police (PNP), gipasanginlan nga nahilambigit sa pag-recycle sa kapin sa 160 ka kilong shabu nga nasakmit sa 13 ka polis unom ka tuig ang nilabay. Gitumbok sab siyang nidupa sa iyang mga sakop. Apan niinsistir si Albayalde pagpabilin sa katungdanan.

* * *

Human sa kamatayon sa trahedya, si Evangelista nipa-imbestigar dayon sa tanang gilambigit nga mga opisyal ug kadete sa PMA.

Gisuspenso gilayon ang tanang gipasakaan og kasong administratiba. Ug nitabang sa kapolisan sa pag-andam ug pagpalig-on sa mga kasong kriminal.

Bisan nisibaw nang pulos bag-o og SUV ang 13 ka polis nga nakaapil sa operasyon sa Pampanga niadtong 2013, wa mohimo si Albayalde og bisan unsang imbestigasyon.

Gipasanginlan hinuon nga naka-SUV sab. Maong napugos ang Kampo Crame sa pagtangtang niya pagka hepe sa kapolisan sa Pampanga samtang gi-imbestigar ang iyang mga sakop.

* * *

Ang resignasyon ni Evangelista wa makapapas sa talagsaon niyang mga nahimo isip sundawo sa republika: Siyay nangu sa Light Reaction Battalion, Special Forces Regiment (Airborne), Army Special Operations Command (SOCOM) nga naglakip sa Special Forces Regiment, Scout Ranger Regiment ug Light Reaction Regiment.

Siyay nagsuwat sa Special Forces Manual sa AFP. Siya say pangu sa 6th Special Forces Battalion nga maoy gipasidunggan nga nakapukan sa New People’s Army (NPA) sa Bohol.

* * *

Sa iyang pagpamugos nga motiwas sa nahibiling usa ka buwan sa iyang pamunoan sa PNP, si Albayalde nisalikway sa kahigayonan sa pagluwas sa PNP gikan sa pagkaduhig sa iyang personal nga eskandalo.

Giisip na hinuon ang mga pasangil batok sa iyang mga gihimo ug mga wa mahimo nga mga atake batok sa institusyon ug sa kampanya batok sa ilegal nga drugas.

Nipasangil pa nga ang mga pasangil gitumong aron nga di itudlo ni Presidente Rodrigo Duterte ang iyang i-rekomendar nga puli.

Gawas nga di ganahang motahan sa iyang gahom karon, nangambisyon pa gyod nga padayong mogawong sa PNP sa umaabot.

* * *

leolastimosa@gmail.com

HENERAL
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with