Ning kalibotan, walay usa nato nga perpekto. Bisag unsaon natog paningkamot nga magmatngon sa kadanlog sa atong gilaktan kada adlaw, may posibilidad gayod nga madakin-as ta.
Magkahugaw ang bisteng gisul-ob ug usahay magaras ang tuhod.
May mga tawo nga dali makahukom-manudya: “Ay, gadanghag lang. Maayra! Mirisi!”
Imbes tabangan sa pag-agak ang nadagma, tiwasan pa hinuog bunal sa mga pulong nga masakit. Inay sapwangon sa mga matinabangong palad aron makabalik pagtindog og tarong, gibusdakan pa hinuon sa mabug-at ug walay hunong nga pagpanaway.
Nalimot ang tawo, nga moabot ang higayon, nga siya masukakamod usab. Kay kinsa ba nato ang dili masipyat? Kinsa ba nato ang dili matental sa pagpakasala? Labi na ning panahon, diin ginudnod pagsamot sa atong mga lider sa nasod kitang mga kabos nga hagbay rang nagkamang sa tumang kalisod ug hapit na lang mokaon og lapok aron maoy itambal sa labihang kagutom.
Sa tinuoray lang, tungod sa kawad-on, mapugos na lang intawon usahay ang tawo pagbuhat og daotan nga wala sa iyang hunahuna.
Niadtong Septiyembre 23, may empleyada sa department store, kinsa buntis, nga gipadakop sa iyang agalon kay gidudahan nga nagawat og panty nga tag P149.
Naghilak intawon sulod sa prisohan ang maong mabdos gumikan sa maong pasangil, diin siya mipahayag nga tungod sa iyang kasingtanon, mikuha siyag usa ka panty sa mga baligya nga iyang gibantayan aron maoy itrapo.
Nakit-an siya sa guwardiya. Gisukna unsa kuno kadto iyang gihawiran, diin daling nakatubag ang buntis nga panyo. Nga sa ato pa, klaro kaayong wala siyay intensiyon sa pagkawat niini. Apan bisan pa man, nangayo gihapog pasaylo ang babaye tungod kay matod pa niya wala kadto tuyoa. Apan gidala gyod siya sa security personnel didto sa police station ug gibilanggo, diin makagawas lang kon makabayad sa tukmang piyansa.
Mikabig og nagkalainlaing reaksiyon ang maong hitabo. May nakasaway. Aduna poy naluoy. Lalim bay, P149 lang nga panty, miguba sa iyang trabaho ug kadungganan?
Pagkapait kon mawad-an kag pangita ning panahona. Hapit na ra bang Pasko.
Nagpasabot ba kini, nga tungod sa kapait sa kapanginabuhian dinhi sa Pilipinas, ultimong hapin sa inampingang bahin sa lawas wala nay ikasarang ang trabahante sa pagpalit?