Ang GCTA o Good Conduct Time Allowance orihinal kini nga gipalabang ni kanhi Senador Aquilino “Nene” Pimentel Jr. niadtong 13th Congress apan kun wala ko masayop naabtan kini sa adjournment sa Kongreso. Ang namatay nga si Senador Miriam Defensor Santiago mipalabang niini pag-usab sa 15th Congress ug nahimong balaud dihang gipirmahan ni Presidente Benigno Simeon Cojuangco Aquino III niadtong Mayo 29, 2013. Sa tinamban nga pagsabot, ang GCTA usa ka benepisyo nga mapahimuslan sa piniriso nga nagbinut-an sulod sa prisohan. Kining maong balaud anaa na sukad pa kaniadtong tuig 1906 pinaagi sa Akta 1533 nga nagpaminus sa silot sa mga piniriso tungod sa pagtinarong sulod sa prisohan.
Basi sa hukom sa Korte Suprema kaniadtong tuig 1908 ang balaud adunay duha ka tumong: una pagdasig sa mga konbiktado sa pagpaningkamot nga mag-usab sa ilang kinabuhi sulod sa prisohan ug ang ikaduha mao ang pag-aghat sa mga piniriso sa paghimo og kaayo ug tabang sa disiplina nga ipatuman sa mga prisohan ug mga penitentiaries.
Human sa 24 ka tuig ang Revised Penal Code of the Philippines (RPC) napatuman ug giapil niini ang Good Conduct Time Allowance sa mga piniriso nga anaa sa prisohan.
Kaniadtong Mayo 29, 2013 gipirmahan ni Presidente Noynoy Aquino III ang Akta Republika 10592 diin giusab niini ang Articles 29, 94, 97, 98, and 99 sa RPC ug gipalapdan ang pagpatuman sa GCTA niadtong ubos sa preventive suspension ug niadtong mga piniriso sa wala pa o atol sa pagbista sa ilang kaso kinsa peligro kaayo nga buhian. Gipatasan sa maong balaud ang gidaghanon sa mga adlaw nga i-credit sa GCTA, gitugot ang dugang 15 ka adlaw nga i-minus sa matag buwan sa pagtuon, ug pagtudlo nga serbisyo, pagpalapad sa special time allowance nga ihatag niadtong mga loyal nga piniriso ug sa pagpatuman niini bisan niadtong mga gipaubos sa preventive imprisonment. Ubos niining maong balaud sa unang duha ka tuig nga pagka priso ang piniriso adunay 20 ka adlaw sa matag buwan ang iminus sa iyang pagka priso tungod sa iyang pagbinuotan sulod sa prisohan, 23 ka adlaw kon siya napriso sulod sa tulo ngadto sa lima ka tuig, 25 ka adlaw kon napriso sulod sa unom ngadto sa napulo ka tuig, 30 ka adlaw kon napriso sulod sa onse ka tuig pataas ug dugang 15 ka adlaw ang I-minus sa matag buwan kon ang piniriso nagtoon ug mihatag og serbisyo pinaagi sa pagtudlo. Ang mga piniriso usab nga nakaikyas sa prisohan tungod sa kalamidad makaminus og one-fifth sa ilang sentensiya kun mobalik sila sa prisohan sulod sa 48 oras human gilibkas sa kalamidad.
Maayo man ning maong balaud. Wala lay ayo ang nagpatuman.