Panahon na nga mobiya ug mobalhin og laing dapit gawas sa City Hall sa Lapu-Lapu si Kongresista Paz Radaza kay bisan ang mga iring wala makauyon nga magbutang siya og iyang kaugalingon nga opisina sa City Hall.
Ang ulohan sa mga balita nga napatik sa mga pamantalaan dinhi sa Sugbo niadtong miaging semana nagkanayon nga nabutangan og hugaw sa iring ang lamesa nga gibutang sa kongresista sa gawas nga bahin sa iyang opisina nga gipakandadohan ni Mayor Junard “Ahong” Chan.
Si Chan mikatawa dihang gipangutana sa mga tigbalita kinsa ang nagbutang og hugaw sa iring dungan sa pag-ingon nga dili niya puwedeng masugo ang iring.
Sa iyang pagpakigkita sa mga tigbalita buot ipasabot ni Radaza nga gituyo ang pagbotang og hugaw sa iring pero in fairness ni Mayor Chan wala siyay labot niini kay binuhatan kini sa iring nga diha gayod magbilin sa iyang hugaw sa mga lamisa nga gibotang sa kongresista.
Labing siguro wala pud makauyon ang mga iring sa pagmagahi sa kongresista sa pagbiya sa iyang gihimong opisina sa City Hall bisan pa man og gipapahawa na sa bag-ong napiling mayor sa dakbayan sa Lapu-Lapu.
Mas maayong respetohon na lang sa kongresista ang hukom sa Mayor nga kuhaon ang giokupar niining opisina sa City Hall tungod kay gamiton pud kini.
Sigun sa gipagawas nga legal opinion ni Department of Interior and Local Government Secretary Eduardo Año adunay gahom ang Mayor kinsa ang iyang hatagan og opisina sa City Hall.
Busa sundon na lang unta sa kongresista ang pahayag ni Año ug hukom sa Mayor.
Ang kaandam sa kongresista sa pagbayad og abang sa opisina sa City Hall nga iyang okupahon dili isyu kun dili ang iyang respeto sa bag-ong napiling mayor sa dakbayan.