Paukyab

Tan-awa, paukyab ra gyud lagi kadtong pagpasirado kunohay sa mga Small Town Lotteries (STL) sa tibuok nasud, kay karon gimando na man usab ni Presidente Duterte nga buksan kini pagbalik.

Ang mihimo sa rekomendasyon mao ang kadagkoan sa Philippine Charity Sweepstakes Office (PCSO) nga gipangulohan ni Koronel Royina Garma nga mao na karon ang general manager.

Dili gyud nato kapugngan kun dunay magduda nga kadtong gihimo nila ni Garma maisip ra gyud nga kabahin sa “Oplan Pakilala” nga siya na ang bag-ong manager sa PCSO.

Pabor gyud kaayo ko nga gipabuksan pagbalik ang mga outlets sa Lotto, kay duna man kini direkta nga kontak ngadto sa PCSO-Manila ug mao nga inigpatad nimo, lusot dayon ang tiket.

Apan kining mga STL sagad niini mga ilegal, ug gi-operate sa mga tawo nga nalambigit sa masiao. Kun tugotan man ang STL kinahanglang himoon nga susama sa Lotto nga inigpatad sa mopusta, mogawas dayon ang numero, dili kay isuwat ra sa kamot.

Angay nga hugtan sa paghimo og kampanya sa kapolisan kining maong mga ilegal nga sugal nga nagpatuo nga mga legal nga STL, apan diay mga masiao. Daghan kaayo kini sa hapit tanang barangay.

Dinhi sa Dakbayan sa Sugbo nagduda ko kun makahimo ba og hugtanay nga kampanya ang kapolisan batok niining mao nga mga ilegal nga sugal.

Naa pa man gani diha ang mga video karera nga wala gyud hilabti sa mga polis sa lainlaing police stations. Moingon mo nga wala? Buyno, awhagon nako ang mga nagsunod ning akong lindog sa pag-report sa 0943-0766611 kon may mga video karera ug moli-moli diha sa inyong dapit.

Unya, i-report sab ang mga STL outlets nga nag-isyu og mga resibo nga gisuwat ra sa kamot kay klaro kaayo ni nga masiao ug walay pagtugot sa PCSO.

* * *

Dunay Traffic Summit nga pagahimoon karong Septiyembre 20 ug gidapit nga motambong niini ang mga representante sa mga Local Government units (LGU) dinhi sa Sugbo ug sa pipila ka ahensya sa atong kagamhanan.

Ambot og masulbad ba kaha ang problema sa traffic pinaagi niini. Kaniadtong 2002, may Traffic Summit man sab nga gihimo diha sa MCWD Auditorium, nakahinumdom ba kamo?

Usa ko sa mga reporters nga mi-cover sa Traffic Summit 17 ka tuig na ang nilabay, diin daghan ang mga gisugyot nga paagi nga kunohay makasulbad sa problema sa trapiko. Unya nasulbad?

Tungod kay human sa Traffic Summit, ang mga gituki ug gisugyot sa mga nanambong, gilubong ra sa bung-aw sa kalimot.