Kompiyansa. Mao kini ang tukmang pulong nga ikahulagway sa mga sabongero, kinsa murag nabasang piso nga nadakpan sa mga nangrondang uwak sa kagamhanan sulod sa D and C Coliseum sa Barangay Ibabao, Mandaue City niadtong hapon sa Agosto 5.
Tungod sa kadaghan, wala na masulod sa prisohan. Ang uban diha na lang pahigdaa sa gawas duol sa opisina sulod sa Criminal Investigation and Detection Group (CIDG-7), Central Visayas compound.
Walay kaon. Walay mainom. Walay klarong katulganan tibuok gabii. Pipila kanila may mga sakit. Wala makadalag tambal. Unsa na lang kaha intawoy gitomar?
Ang pait kay may nadakpan nga kondili kuno makakaon motokar ang pagkayabag sa panghunahuna. Ay, pastilan!
Hinuon, may igong sukaranan ang ilang kompiyansa. Dili bag-o ang maong adlaw sa pagpamulang nga ilang nasudlan.
Hagbay ra nila kining gidumdom, kay segun sa ilang nahibaw-an, ang tag-iya sa maong bulangan, mga pamilyang Cortes kuno, kinsa may dako ug ligdong nga bansagon nga giampingan.
Busa, dili gyud bastabasta mo-operate ang maong bulangan kon kini walay pagtugot sa lokal nga pangagamhanan.
Kini maoy naabot sa ilang pangagpas ug sinugarol nga pag-analisar.
Kay kon sila nasayod pa nga walay pagtugot, dili sila bubo nga mosulod. Adto na lang sila sa tigbakayan. Kay sagad ang mga mananakop didto, pirmeng abli ang palad sa likod, nagpaabot hain iyang bahin.
Didto, dili mga sabongero ang dakpon. Kondili, ang kuwarta maoy hakpon.
Kini ang lig-ong rason nganong ang tigbakayan, nahisama sa illegal drugs nga bisag giunsa pa kunohay sa pakiggubat sa kagamhanan, dili gyod mapukan. Molipang hinuon!
Luoy ang 300 kapin ka sabongero nga nadakpan. Kay nahulog gyod nga maayo silang pagka-shot sa taro tungod sa ilang maling akala.
Tiaw bay, diha na lang sila nahibalo nga illegal diayng adlaw sa sabong ang ilang gisudlan dihang gisikop na sila!
Unta sa pagsugod pa lang sa pag-operate sa giingong gidiling adlaw, gidakop na sa kapolisan ang maong bulangan.
Apan nganong wala man kini mahitabo. Nganong gipasagdan man nga molungtad pag dugay, una pa dakpa?
Nagpasabot ba kini nga ang balaod sa Pilipinas, weather-weather lang?
Nan, kinsa bay sad-an niining tanan: ang mga sabongero, o mananakop? How about the owner?