Dulan sa 400 ka mga sabongero ang gisikop sa kapolisan niadtong Lunes sa gabii didto sa dakbayan sa Mandaue tungod sa illegal nga sugal. Ang mga sugarol nasakpan sulod sa D&C Coliseum sa Barangay Ibabao nga nag-atang sa sultada sa mga manok.
Ang mga operatiba sa Criminal Investigation and Detection Group mironda sa buwangan tungod sa reklamo nga miabot didto ni PNP Chief Oscar Albayalde. Sumala sa taho nga adlaw-adlaw ang operasyon sa buwangan bisan kun ang balaod nagtugot lang sa pagpahigayon og buwang panahon sa Domingo, legal holidays, local fiesta, ug ubang espesyal nga mga adlaw nga gitagana sa kalingawan.
Pinasikad sa Presidential Decree 449 gironda sa CIDG ang buwangan og gihurot og dakop ang mga sugarol nga ilang naabtan. Miabot gyud og 370 ka mga tawo ang ilang nadakpan ug gitanggong sukad niadtong Lunes sa gabii.
Tungod sa kadaghan sa mga dinakpan naglisud ang kapolisan pagpakaon nila ug ingon man pagpahiluna nila sa prisohan. Resulta nangapasmo ang mga dinakpan ug napugos sila pagpakatulog nila gawas sa ilang buhatan.
Naglibog lang ko nganong ang mga nanugal maoy gidakop sa kapolisan kun ang reklamo mao ang illegal nga operasyon sa buwangan. Dili ang mga misulod sa buwangan maoy angayan nilang gukdon kun dili ang operator.
Way sugarol nga mosulod sa buwangan kun kini sirado. Labing siguro wala say kalibutan ang mga gidakop nga wala diay pagtugot ang buwangan nga mo-operate matag-adlaw. Kun ikaw sugarol dili ka mangutana kun may permit ba ang buwangan sa dili ka pa mosulod.
Dili ni obligasyon sa mga nanugal ang pagsusi legal ba ang permit sa buwangan. Hinunoa obligasyon sa operator ang pagsiguro nga husto ang iyang permit.
Sa ato pa kun duna may angayang pusasan ang kapolisan dili ang mga inosenteng sugarol nga igo lang nanimpalad nga swertehon kun dili ang tag-iya ug ang mga nagpasiugda niini. Ang nahitabo sa Mandaue naghatag og impression sa publiko nga hadlok ug magpangikog ang kapolisan paggukod sa tag-iya sa buwangan.
Gani hangtud gahapon mapanagan-on kaayo ang kapolisan nga motug-an kinsay tag-iya sa maong buwangan bisan kun ang city administrator sas Mandaue nga si Jamaal Calipayan miangkon na nga ang pamilya ni Mayor Jonas Cortes maoy tag-iya niini.
Karon ang pangutana, duna bay igong kaisog ang kapolisan nga mopasaka og kaso batok ni Cortes ug sa iyang pamilya?