Labihan kadinalian sa panginahanglan sa pagtukod og kabalayan alang sa labing kabos nga mga pamilya sa Sugbo ug ubang bahin sa nasud.
Maong gihangop sa katawhan nga hangtod karon nagdamgo pa nga makapanag-iya og mga pinuy-anan ang pagkatukod na sa Department of Human Settlements and Urban Development (DHSUD).
Human sa tulo ka dekada nga pakigbisog sa Kongreso, napasar ang balaudnon ug gipirmahan ni Presidente Rodrigo Duterte isip Republic Act 11201 niadtong Pebrero. Ang subo nga balita mao nga sukwahi ang sulti sa housing sa aktuwal nga buhat ning maong pamunoan.
* * *
Nipasalig ang Malakanyang sa pagtukod og 12.3 milyones ka pinuy-anan sa mosunod nga usa ka dekada: Aron pagtapak sa kuwang nga 6.7 milyones ka pinuy-anan gikan sa 2001 hangtod sa 2015; ug aron pagtubag sa gikinahanglan nga 5.6 milyones ka pinuy-anan gikan sa 2016 hangtod sa 2030.
Isip tubag, gitakda sa Philippine Development Plan (PDP) 2017-2022 nga gidasonan ni Presidente Duterte ang paggahin og P50 bilyones matag tuig alang sa housing.
Apan ang aktuwal nga nahitabo mao ang paglaslas sa tinuig nga gahin alang sa housing hangtod nga nitibugsok sa kina-ubsan karong tuiga.
* * *
Sa unang tibuok nga tuig sa pamunoan ni Presidente Duterte, nihiyos ang gahin sa housing ngadto sa P15.3 bilyones sa 2017; dayon gilaslasan ngadto sa P5.5 bilyones sa 2018; ug gitiwasan pagpug-ok ngadto sa P3 bilyones karong tuiga.
May sukaranang pagduda sa kapuslanan sa DHSUD kon saboran lang og mumho.
Alang sa sunod tuig, kanus-a makabuylo nang operasyon sa DHSUD, nirekomendar ang Malakanyang og gahin nga P6.2 bilyones, 12% ra sa gikasabotang pundo.
* * *
Ang DHSUD maoy mopuli sa Housing and Urban Development Coordinating Council ug sa Housing and Land Use Regulatory Board ug moduma sa National Housing Authority, National Home Mortgage Finance Corp., Home Development Mutual Fund ug Social Housing Finance Corp.
Apan ang Malakanyang wa mopakita og kadasig sa paghimo sa bag-ong departamento nga takos ug andam sa mahinungdanon ug dinaliang tahas sa pagpanday og atop nga kapasilongan sa kapin sa 12 milyones ka kabos nga mga pamilya.
Gawas nga way klarong budget, napakyas si Presidente Duterte pagtudlo og kalihim sa DHSUD. Unom ka buwan human niya pirmahi ang balaod.
* * *