Kuyaw gyud kaayo kun dili lig-onon sa mga kontraktor ang masi’g ka daplin sa gikawot nila nga lawom kaayong foundation alang sa pagtukod og dagko ug tag-as nga building kay hayan nga makahatag kini og peligro sa mga nag-estar sa kanait nga dapit, kilid sa ilang gikawot nga lungag.
Kagahapon sa kaadlawon, kalit lang milugapak sa likud nga bahin sa building nga giabangan kaniadto sa Social Security System (SSS) diha sa eskina Gorordo Avenue ug Escario. Nahugno diay ang kabahin sa balay kay natumpag ang daplin sa gikawot nga lungag kilid sa ilang nahimutangan.
Dunay nagpadayon karon nga pagtukod og condo project sa maong dapit, mao nga ang kontraktor nagkawot og lawom nga lungag para foundation sa building.
Daghang building ug kabalayan kilid gyud kaayo sa lungag. Maayo man gani kay walay kinabuhi nga nadisgraya sa hitabo.
Ingon niini ang pamaagi sa mga kontraktor. Ang ngilit sa gikalot nila nga lungag, ilang pangtuslokan og tag-as ug dagkong mga kabilya, dayon sementohon ang daplin aron mapugngan ang pagkatumpag sa yuta sa kanait nga property. Apan usahay dili gyud kapugngan ang aksidente.
Mao kini ang akong gikuyawan nga angay tingaling susihon sa Office of the Building Official (OBO) kining gikawot nga lawom kaayong lungag diri sa daplin sa Veterans Drive, unahan sa Marco Polo Plaza Hotel kay dugay na kaayo ni nga wala maatiman.
Mora’g gibiyaan na man sa kontraktor. Ang lungag naa gyud kilid sa karsada, ug walay hunong ang mga sakyanan nga mangagi diha.
Kon mahitabo nga matumpag, aw sigurado nga daghan ang mangamatay kay walay hunong ang mga sakyanan nga mangagi diha.
Wala lang tingali makabantay ang uban nga kanang gikural nga green nga sin daplin sa karsada, lawom na nga bung-aw ang likud niana.
Kay og may magdasmagay ug mapunta nianang mga sin, aw, adto na punita sa kinaubsan nga ang gihabogon mora’g layog nga lubi.
Atong awhagon si OBO Chief Florante Catalan nga ipasusi niya kining proyektoha diha sa unahan sa Marco Polo Hotel nga naghatag og dakong risgo sa publiko.
* *
Buyno, pahimuslan diay nako ang pagtimbaya ni Konsehal Allan Ybañez sa Barangay Apas nga magsaulog karong adlawa sa iyang adlaw’ng natawhan. Happy Birthday Konsehal Allan! Sa sinultihan pa namo didto sa Japan, Otanjoubi Omedeto Gozaimasu!
Dako gyud ning selebrasyon ni Konsehal Allan karong tuiga kay mora’g siya maoy labing batan-ong konsehal sa Barangay Apas, ug kugihan sab kaayo. Sigurado nga may singing contest na sab karong gabii sa iyang panimalay.