Magpadayon ang cash assistance

Sa atong pagpaminaw sa pipila ka programa sa radyo, adunay mga nanawag o mga caller nga  gumikan sa pagkapilde sa ilang gilabanan nga kandidato pagka-mayor sa niaging eleksyon,  dili na mapadayon ang cash assistance alang kanatong mga senior citizens.

Atong makita nga ang isyu nga pagkalangan sa pagpanghatag sa cash assistance ilang gisakyan uban sa pagpanghimaraut sa resulta sa niaging eleksyon, nga kun nidaug lang kuno ang ilang kandidato, dili unta  kita karon ma-problema sa cash assistance.

Pastilan, human na ang eleksyon, apan padayon ang pamolitika sa uban natong kaigsuonan nga wala pa makadawat sa resulta sa niaging eleksyon, specifically sa ilang kapildehan.

Angay masayran sa tanang hingtungdan nga ang pagpanghatag sa cash assistance gipasikad sa usa ka ordinansa, sa ato pa, dili na kini mapahunong ni bisan kinsang Mayor ang molingkod sa city hall. .          Unsay hinungdan sa pagkalangan?

Una sa tanan, dili kini tinuyo sa karon Labella administration. Kun wala kamo makabasa nini, atong kutluon kining napatik sa The Freeman: “ Until a supplemental budget is passed, over 75,000 senior citizens registered in Cebu City will have to wait for a while before they can receive financial assistance from the city again as the budget for the year was already depleted last month.”

So, klaro nga ang budget karong tuiga alang sa mga senior citizens kulang na. Sa ato pa, nagkinahanglan og supplemental budget alang sa padayon nga pagpanghatag sa cash assistance,

Sa akong nasayran, sa P8.1 billion nga annual budget karong tuiga, ang niaging administrasyon sa siyudad nigahin og P455 million lamang alang sa mga senior citizens. Meaning, kutob lamang sa bulan sa Hulyo ang maong kantidad,

Matud ni Mayor Edgar Labella, sa pakighinabi uban sa The Freeman,  “I have already directed the finance committee, the finance group, to start the preparation for the supplemental budget,” ug lagmit ma-calendar na kini sa sunod nga session sa Konseho.

Dugang niini, gumikan sa na-aprobahan na nga amendment sa ordinansa nga malakip na sa pagpanghatag kadtong na-rehistro sa tuig 2011 hangtud 2013, ug dili kutob lang sa tuig 2010. So, magkinahanglan og dugang budget alang sa 15,000 nga dugang senior citizens.

Gumikan niini, sa sunod tuig, magkinahanglan kita’g usa ka bilyon ka pesos alang 85,0000 senior citizens sa dakbayan.

Apan, wala kitay angay kabalak-an tungod kay matud ni Labella, aduna kitay igong salapi alang ning maong katuyoan. Hinumdoman nga sa tuig 2015, sa unang administrasyon ni Mayor Mike Rama, 45.5 ka ektaryang luna ang nahalin sa SRP kon South Road Properties. So, duna kitay igong salapi. 

Ang total nga halin mikabat og P16.7 billion, diin ang Court of Appeals nihukom nga legal ug valid ang maong pagbaliigya sa yuta sa SRP.

Again, dili mapahunong ang pagpanghatag sa cash assistance ni bsian kinsa , kaylagi, usa kini ka ordinansa, ug magkinahanglan og laing ordinansa aron pagputol niini.

Ikaduha, aduna kitay igong salapi nga motubag sa panginahanglang cash assistance alang kanatong mga senior citizens. So, wala kitay angay kabalak-an. Ug lagmit, madungan ang pagpanghatag sa duha ka bulan sa Hulyo ug Agusto. So, huwat lang ta. Temporaryo lamang kining pagkalangan.