EDITORYAL - Dag-om sa term sharing

Natudlo na sa hingpit si Taguig Rep. Alan Peter Cayetano isip House Speaker sa Ubos Balaybalauranan. Ang maong posisyon giilogan sa pipila ka mga opisyal nga kundili suod sa presidente, dako og natampo sa kampanya ni Pres. Duterte.

Kagahapong adlawa  sa ikaupat nga State of the Nation Address (SONA) ni Duterte, si Cayetano na maoy nilingkod isip House Speaker.

Apan dili siya molingkod sa maong pwesto sa tibuok termino sa iyang pagka-kongresista tungod kay magbahin man sila ni PDP-Laban bet Marinduque Rep. Lord Allan Velasco.

Daghan ang miisa ang kilay sa term-sharing nga maoy gustong mahitabo sa pangulo. Tingali, nisugot siyang si Cayetano makalingkod isip House Speaker tungod sa sakripisyo pagsuporta kaniya sa magbabalaod sa Taguig sa nakalabay nga eleksyon ug sa mga programa niini.

Samtang si Velasco, daan ng maoy gusto ni Duterte nga matudlo sa maong pwesto, kapartido niya ug siguradong dako sab og nakuhang suporta ang pangulo gikan sa maong magbabalaod.

Si Velasco mopuli og lingkod kang Cayetano paglabay sa 15 ka buwan base sa kagustohan ni Duterte. Apan wala kini magpasabot nga mao na gyud kini ang mahitabo sa umaabot. Kini tungod kay mismo ang anak ni Duterte nga si Davao Rep. Paulo Duterte nipadayag man daan nga wala sa House Rules ang term-sharing. Gusto sa batan-ong Duterte nga subayon gyud ang mga lagda sa pagpili og bag-ong House Speaker ug dili term-sharing.

Posibleng dunay kakulian nga mahitabo ini og kapupos sa termino ni Cayetano kun moinsister gyud ang ubang mga kongresista  nga magbotasyon.

Imbes nga diretsong molingkod si Velasco kinahanglan pa siyang i-nominate sa mga kauban pagka-House Speaker ug ipaagi gyud sa botohay.

Usa kini unya sa mamahimong hinungdan nga mabuak-buak ang super majority sa Ubos Balaybalauranan nga maoy nakapalig-on sa liderato ni Duterte.

Posible sab kahang makaapektar kini sa kalig-on sa grupo ni Duterte sa umaabot nga synchronized National and Local elections sa tuig 2022?