Sayon tuod apan lisod

Kausa nag-order ko og paniudto sa usa ka fast food chain pinaagi sa telepono kay natanggong mi sa trapiko ug mosamot og kalangay kun moagi pa mi sa kan-anan. Gipa-deliver lang nako sa among bay kay sa akong banabana magdungan ra mi og abot.

Apan mas huot ang trapiko kay sa among gikahadlokan. Nabalaka ko nga mag-una pa og abot ang among order. Maong nitawag ko sa guardhouse ug gihangyo ang guwardiya nga pahuwaton lang ang mag-deliver. Maayo gani nga nalangay sab ang nag-deliver ug hapit ra mi nagkadungan og abot.

* * *

Human sa ilad sa pizza nga niduhig sa buhatan ni Cebu City Mayor Edgar Labella sa niaging semana, gikabalak-an nga mahimong mas lisod ang pagpa-deliver pinaagi sa telepono. Kay ang mga kan-anan mahimong mangayo og dugang kalig-onan nga tinuod ug labaw sa tanan mabayran ang order.

Ambot kun kinahanglan na ba silang manawag og balik. O makigsulti sa mga mayor ug ubang nagsugo aron pagtino nga wa lang gamita ang ilang ngan. Apan limitado ang mahimo sa mga negosyante pinaagi lang sa telepono aron pagsegurong di sila ma-ilad.

* * *

Labihang lisora ang paglusot sa telepono sa labing inila nga mga kan-anan nga mo-deliver og pagkaon. Kon makalusot patubagon ka nila og kaliboan ug usa ka pangutana una dawaton ang order. Mas sayon nga tawgan ang gagmayng mga negosyante ug busa mas dali nga biktimahon.

Tingali bantang nga timaan sa pangilad ang pakapin nga pagpangayo og load sa cellphone. Mahimong gigamit ang ngan sa mga mayor aron pagpapas sa kahibung ug pagduda nganong way internet access ang mayor.

* * *

Kausa nag-order ko og kape sa online store ug nipili sa cash on delivery (COD) nga paagi sa pagbayad. Sukwahi sa naandang pagpahibawo dayong deliver, gihatod nilang order samtang wa ko sa sibyaanan. Gigiyahan sa guwardiya ang nag-deliver sa among subdivision. Apan wa sab ko sa bay niadtong higayona.

Dihang nanawag ang guwardiya, ako siyang gipangutana may igo bang kuwarta aron siya lang unay mobayad. Nibalibad ang guwardiya. Nakigsulti ko sa nag-deliver ug gihangyo pagbalik sa sibyaanan. Namalihug ko og kauban sa trabaho sa pagbayad. Hinaot nga di ko matiman-an sa sunod nga pili sa COD. [email protected]