Nganong korapsiyon magpadayon

 “Corruption begins at home.” Kay bata pa gani ang anak, hayloon na sa mga nindot butang bugti sa unsay gustong ipabuhat sa ginikanan. Bahala na’g ang pagbuhat sa ingon, naggiya nila ngadto sa daotang gawi.

Kana lang ingnon sa inahan ang bata: “Kay wala ka motug-an ni Daddy nimo nga nagmadyong ko gabii, palitan tikag mahalong dulaan ug hatagag P100 agig premyo.,” susama ra gyud kini nga gitudloan ang anak sa pagpamakak, diin sa pagpamakak nakita sa linghod pa niyang salabotan, nga makasapi diay siya ini.

Busa, magtubo siya nga matanom sa iyang hunahuna nga diha sa pagpamakak, naa ang kuwarta. Hinungdan, nga kon siya mapropesyonal na, makatrabaho’g opisina, mapribado man o mapubliko, diin pagpreparar sa mga importanteng dokumento maoy iyang trabaho, maanad gyud siya’g pamakak. Bisag ang dokumentong gikinahanglan sa kliyente mahuman lag tulo ka oras, iya kining himoong tulo ka semana, diin pag-abot sa maong semana, ingnon na sab ang kliyente nga wa gihapon ni mapirmahi.

Pero dihang sekretong gitunolag P500 sa kliyente ang maong empleyado, ay, sus, gawas dayon ang papeles, uy!  Kining gidak-ona sa bribe, sagad nahitabo sa mga gagmayng opisina. Unsa na kaha sa mga dagkong ahensiya sa gobiyerno, diin minilyon ka pesos ang transaksiyon nga asikasohon sa mga opisyales matag adlaw?

Matud pang Pres. Rodrigo R. Duterte, iyang payhagon ang kurapsiyon nga nakagamot na halos sa tanang higanteng ahensiya sa gobiyerno. Tuod man, iyang gipangtaktak ang mga head sa buhatan, kinsa natintal pagpangawkaw sa hinagoang salapi sa katawhan.  Apan makalibog! Nga imbes, bawian sila sa tanan nilang nakawkaw aron ibalik ngadto sa panudlanan sa gobiyerno, gihatagan lamang gihapon ang mga kurap ug nindot nga puwesto sa pagpangalagad.

Unta, kutob sa mamatud-an nga kurap, embargohan gyud kini sa tanang bahandi ug salapi nga anaa niya. Hangtod wala nay mahabilin.  Buwahan, motagam!  Unta, magpanday ang Kongreso ug Senado og balaod nga oras may masakpang opisyal nga kurap, i-exempt sa qualified immunity o uban pang matang sa pribilehiyo nga nakahimo nilang untouchable.

Apan may kongresista o senador ba nga misulay pagtangtang ning balaora nga daw bullet proof nga pirmeng nagprotehir nila? Wala! Mao kini rason nganong kurapsiyon dinhi sa Pilipinas magpadayon!