Natigaw ang tanan pagsud-ong sa mga litrato sa morag naagian og dakong baha ang opisina ni kanhi Mayor Tomas Osmeña tungod kay maayong pagkahawan niini human gilukat ang mga gamit nga iya kunong gipanag-iya.
Miani og mga pagbatikos si Osmeña sa iyang gibuhat. Tiaw mo nang gilangkat kadtong mga butang sama sa iniduro ug ubang butang sa comfort room kay lagi bawion sa kanhi mayor kay wala na man siya sa katungdanan.
Maayong pagkahawan sa maong buhatan. Hastang kisame ug ang ubang mga tiles wala na nahitsura. Ang labing gikahimut-an sa uban mao nga hasta ang comfort room wala pasayloa ug maayong pagka-upaw.
Gani daghang mga political supporter ni Osmeña ang wala usab makauyon sa iyang gibuhat. Mibotar kuno sila kang Osmeña sa niaging eleksiyon tungod kay lagi lunod-patay ang ilang suporta niini. Apan sa nahitabo sa iyang opisina, nawad-an na hinuon og respeto ang pipila kanila.
Bitaw. Nakaingon ko pagtan-aw nako sa maong mga hulagway nga subra ra kaayo ang gibuhat ni Osmeña sa iyang opisina. Nakaingon ko nga mora’g dili kadto binuhatan sa usa ka halangdon ug respetado nga lider sa usa ka dakbayan sama sa Sugbo.
Hinuon, sa laing bahin, adunay katungod usab si Osmeña nga kuhaon kadtong iyang mga butang nga gi-decorate sa iyang opisina ilalum sa iyang termino. Karon nga wala na siya sa katungdanan, angay lamang usab niya kini nga dad-on og balik. Matud pa sa kanhi mayor nga siya ang nagpa-improve sa iyang buhatan gumikan kay wala kuno aprobahi sa konseho sa dakbayan ang pondo alang sa pag-renovate niini. Gani, migasto kuno siya og dili mominos P2 milyones alang sa renobasyon sa iyang opisina.
Apan bisan pa man niini, grabe usab ang paghawan sa maong buhatan. Basi sa mga hulagay nga nagsirkular karon sa social media, morag nawad-an gayud og dignidad ang Office of the Mayor tungod gibuhat sa maong mayor.
Kadtong mga butang nga dili na madala pa sa paghawa ni Osmeña, ilabina sa iniduro ug ubang mga gahing nakakabit, wala na unta pugsa og langkat. Ug nga magpabayad na lamang unta ang kanhi mayor sa maong mga butang.
Apan iya gyud nga gihuboan ang iyang buhatan sa tanan. Ug dili usab malikayan ang pag-alburoto sa katawhan.