Padulong sa Malabuyoc

Dili ikalimod nga hapit na gyud mao nga sa Malabuyoc ako niadto aron akong mga estudyante mapa-enroll nako didto. Sa maong panaw daghan ang nangagi nga mga kasinatian sa akong panumdoman labina kun maghisgot kita sa Sangi, Alegria.

Una, mao ning dapita nga unang na destinohan sa mga pari nga akong naalagaran kanhi ingon nga seminarista. Silang Padre Blurred didto sa Ronda ug kang Monsenyor Jojo Dosado nga nahimong kura niini sa dugay na nga panahon.

Matud pa nga daghan na kaayo og kausaban niini. Hinuon mas mahinungdanon gyud unta ang kausaban sa kinabuhi. Sa akong bahin akong nakita sa akong kaugalingon kining mosunod:

1. Una, ang maong gilay-on nakahatag nako og bag-ong kahigayonan sa pagkat-on diha sa bag-ong kalikupan sa kaugmaran sa kaugalingon.

2. Ikaduha, makapahuway ko gikan sa makutas nga panaw sa kinabuhi ug panlimbasog. Ang tanan nahimong napahamutang lang segun  sa kabubut-ong Diosnon.

3. Ikatulo, kining maong kahigayonan sa paghimamat og bag-ong mga kaila ug mga higala sa kinabuhi. Ning maong kasinatian nahimong mas daghan pa ang atong mamahimong kauban sa panaw sa pagtuo. Dili lang kini mahitungod lang sa gitawag nga income o unsa.

Mahitungod kini sa bag-ong working relations nga maghatag nimo og bag-ong perspektibo sa imong panaw. Kining maong panaw sa kinabuhi nahimong nahimugso ang laing gutay sa kinabuhing malambigiton.

Nalipay ko nga bisan pa man kun tuod nahimong bag-o ang maong dapit alang kanako apan ang Dios padayon nga nihatag sa iyang panalangin ug paggiya. Salamat na lang kay nahatagan og kahigayonan sa pagkat-on.

Good Morning para ugma kay matag sugod sa panaw bag-ong bidlisiw sa paglaum nga gilatid ni Haring Adlaw! Ang Malabuyoc usab nahimong kabahin tungod sa CTU nga atong pagatunghaan. Ug nanghinaut ako nga bisan pa man sa akong limitasyon duna gihapon koy mahimo alang sa katawhan.