Medyo layo layo ang bukid nga akong giadto gahapon kay lagi fiesta man ni San Isidro sa buwan sa Hunyo. Nagmisa ko sa kapilya sa dihang may hubog nga misulod. Nangandam ko sa akong kaugalingon kay basin manghasi ni sa sulod tingali kun magbinuang kini magamit nako ang akong pangamot.
Kun hubog ni dali ra kaayo ning patiran ug sukmagon. Apan dili maayo kining maong laraw. Ang hubog bisan kun nagkayuring ang nikuot sa iyang bulsa aron mohulog sa sibot ug human siya makahulog niini migawas siya sa kapilya nga way pananghid. Padayon ang Misa nga walay dili maayong insidente.
Sa akong kaugalingon ako nakapamalandong nga ang maong hubog ang wala gihapon tingali mawad-i sa iyang panimuot kay bisan sa iyang pagsusapinday nihalad gihapon siya uban ang kalipay.
Dili ikalimod nga diha sa atong pagsimba dili nato ma-expect nga mamahimong hingpit ang tanan. Dunay mga tawo nga usahay atong tan-awon ingon nga mga walay buot. Wala silay buot tungod kay lahi ilang panabot sa atong panabot. Apan kun buot hunahunaon may mahatag gihapon sila alang kanato. Ang ilang kayano halawom og ikatudlo.
Kay unsa man ang ilang matudlo nato?
Una, diha sa paghatag wala kinahanglana ang gidak-on. Ang mahinungdanon ang diwa luyo sa maong paghatag.
Ikaduha diha sa paghatag hinumdomi nga usahay ang ihatag ang panalangin sa paagi nga wala nato masabti. Apan bisan pa man kun wa kita makasabot niini ato kining dawaton uban ang kalipay kay sila bisan sa ilang kalisud ang ni exert og effort makahatag lang niini.
Ikatulo angay ug matarong nga ato silang hinumdoman diha sa ilang pagkamanggihatagon ug imbis ato silang bayran ang maong kaayo atong ibayad usab sa uban.
Ikaupat mao nga sila nga atong gibuhatan og kaayo ato pud dasigon nga mohimo sa ingon ngadto sa uban.....Basin na lang kun mausab ang kalibutan pinaagi ning ginagmay nga buhat sa kaayo.