Kalamboan sa Sugbo
RENBOR PATROL - Rene U. Borromeo (Banat) - May 25, 2019 - 12:00am

Kun ang mga nag-unang problema sa atong dakbayan, sama sa dili epektibo nga paghipos sa basura, grabeng problema sa trapiko ug ang kanunay’ng pag-awas sa mga sapa, masulbad gani ni incoming Mayor Edgardo Labella makaingon ko nga lisud na gyud siyang mapilde pa.

Kining maong mga problema wala gyud kahatagi og kasulbaran atol sa termino ni Mayor Tomas Osmeña, ug bisan na sa administrasyon kaniadto ni kanhi mayor Michael Rama, nga molingkod na usab pagka bise mayor.

Kabahin hinoon sa traffic, tan-aw nako, lisud gyud kining masulbad kun dili palapdan ang atong mga karsada ug dili kita maghimo og dugang infrastructure projects, sama sa mga skyways paingon sa mga silingan nato nga siyudad ug kalungsuran.

Mao kini ang rason nga bisan og daghang sakyanan sa ubang kanasuran, apan wala sila makasinati og grabeng traffic kay aduna man sila’y mga skyways. Dinhi sa ato, flyover lang ang atong gihimo nga inig-abot sa unahan mahunong na usab ang mga sakyanan.

Bahin sa problema sa pag-awas sa atong kasapaan, kinahanglang palawman gyud ang atong mga sapa paingon sa dagat, dili kay ang palawman nga bahin sa sapa ang anaa ra sa downtown area aron ipakita sa mga tawo nga may gihimo ang mga opisyal apan walay kapuslanan.

Mahitungod sa mga basura, angay gyud nga magmugna na ang siyudad og Waste to Energy (WTE) plant aron mosunog sa mga basura ug sa samang higayon, ang maong planta makatabang pa sa pagsuplay og kuryente.

Ang WTE plant mahimong himoon bisan diha sa karaang landfill sa Inayawan, kay dili man kini makamugna og baho.

Ang mga WTE plants sa ubang kanasuran nahimutang sa mga residential areas, apan wala gyuy reklamo ang mga lumolupyo kay ang maghakot sa basura, mga sirado man nga compactor trucks ug ang basura adto man iyabo sulod sa planta nga dili makaalisbo ang baho.

Unta, kining maong mga problema kahatagan dayon og sulbad sa administrasyon ni Labella, ug nga unta menosan ang pagpamolitika nga panimaslan kadtong mga tawo nga nahimong kaatbang nila sa miaging eleksyon.

Tan-aw hinoon nako ni Labella, mora’g dili kini madinumtanon nga pagkatawo ug nga unta ang iyang kaugalingong panghunahuna maoy iyang ipatigbabaw, ug dili ang mga diktar kaniya sa ubang mga tawo nga nakatabang kaniya sa pagpadaog.

Alang sa mga kontra ni Labella sa miaging eleksiyon, mohunong usa kita sa pagpamolitika ug suwayan nato pagsuporta si Labella kay basin og magmalampuson siya sa pagpalambo sa atong siyudad.

KALAMBOAN
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with