Labor of Love

Dali ra kaayo miligid ang panahon, hapit na matapos ang bakasyon kay sugod karong adlawa mao na ang Brigada Eskwela nga molungtad og usa ka semana.

Ang mga magtutudlo walay pahuwayay kay gikan sa serbisyo nila sa eleksyon usa ka semana ang nakalabay, karon kombate na sad sa Brigada Eskwela aron maandam sa pag bukas sa klase karong Hunyo 3 sa mga pampublikong tunghaan.

Samtang sng mga pribadong eskwelahan depende na sa mga tagdumala kon kanus-a ang ilang school opening.

Ang Department of Education milusad sa ilang Brigada Eskwela sa isla sa Carnasa sa isla sa Bantayan diin gipili nila aron matutokan kon aduna may mga problema sa mga gagmayng tunghaan sama sa Carnasa.

Gipadayag hinoon ni Dr. Rhea Mar Angtud, Schools Division Superintendent sa Deped Cebu Province nga andam na ang tanan alang sa pag bukas sa klase.

Napangitaan na og solusyon ang mga naandan nga problemang masugatan, wala usay problema sa mga magtutudlo kay igo ra usab alang sa gidaghanon sa mga tinon-an. Sa lalawigan sa Sugbo adunay mokapin sa 700,000 ka mga tinon-an ang motungha karong tuiga.

Ang preparasyon sa pag bukas sa klase dili lang tahas sa mga magtutudlo kon dili apil na usab ang mga ginikanan ug mga tinon-an.

Busa gikinahanglan ang pagtambayayong karong semanaha sa Brigada Eskwela pinaagi sa pagpaambit og bisan nga magamit sa pag repair sa mga bangko, pintal kon naay ikasarang, ug labaw sa tanan ang gitawag nga “Labor of Love” gamiton ang kusog sa

pag pamanday o pag panglimpyo sa palibot ug mismo sa mga classrooms. Ang maong kalihokan gitumong aron dili na mabalda pa ang pag sugod na sa klase aa Hunyo 3, diretso na gyud sa klase.

Alang sa mga duna nay ikapamalit og mga gikinahanglan sa klase, mas maayong mosayo sa pag pamalit tungod kay expected na nga magdasok na sad mga tindahan ang mangomprahay. Alang sa mga tinon-an nga gustong makadaginot, pwed ra pud hagpatan kadtong mga notebooks nga wala kaayo magamit sa nakalabayng tuig tungha kay magamit pa kadto, lakip na ang krayola, lapis, ug uban pa.

Bitaw, alang sa mga dili excited nga gusto pang lugwayan ang bakasyon aw,

back to reality mata og sayo, sa sunod semana pa.