Ang hinungdan sa paglaslas sa presyo sa mga produkto sa lana karong semanaha—ang gagmayng mga kompaniya sa lana nipatuman na gahapon samtang ang higanteng mga kompaniya ugma pa sa buntag—mao ang pagbaha sa suplay sa lana gikan sa Estados Unidos.
Nga nakabaraw sa sunudsunod nga pagsaka sa presyo tungod sa agresibo nga paglaslas sa kalibotanon nga produksiyon sa lana bale og 1.2 milyones ka baril matag adlaw sa mga nasud nga sakop sa Organization of Petroleum Exporting Countries (OPEC) nga gipangaluhohan sa Saudi Arabia ug sa OPEC+ nga gipangulohan sa Russia.
* * *
Ang Estados Unidos nga mao na karon ang labing adunahan nga tinubdan sa lana (naapsan na niya ang produksiyon sa Russia ug Saudi Arabia sa niaging tuig), sa makausa pa, nipakita na sa iyang braso ug nimatuod nga siya ang tinuod nga hawod, nga nisangpot sa pagbarato sa lana bisan sa labing seryuso nga mga hulga sa kalibotanong suplay sa lana:
Ang ekonomikanhong mga silot nga gipahamtang ni US President Donald Trump batok sa Iran ug Venezuela;
Gubat sa Libya; ug
Krisis sa produksiyon sa lana sa Nigeria.
* * *
Labing nauwawan sa nagkadako nga tingog sa Estados Unidos sa pagtakda sa presyo sa lana sa merkado sa kalibotan mao ang OPEC.
Nga maglisod pa pagdawat sa bag-ong kamatuoran nga sila ra ang magbuot kanus-a pausbawan ang presyo sa lana ug kon pila ang ilang ipatong.
Bisan sa ilang pakigkonsabo sa OPEC+, nga naglakip sa Russia ug ubang mga nasud nga di sakop sa OPEC, napugos sa makadaghan nang higayon pag-angkon nga duna nay mas hambogero pa nila.
* * *
Laing labad sa ulo sa OPEC samtang mangandam sa ilang tigom sunod buwan sa Vienna aron sabotan kon ipadayon ba hangtod sa kataposan ning tuiga ang paglaslas sa ilang produksiyon.
Kay ang Iran (uban sa Iraq ug Venezuela) nipasidaan nga kon di supakon sa OPEC ang economic sanctions mapugos sila sa:
Pagputol sa mga lina sa lana sa mga sakop sa OPEC nga mopaluyo sa ban sa ilang oil exports nga gituohan nga makapa-bangkarota sa ilang ekonomiya; ug
Paggamit sa ilang puwersang militar batok sa mga sakop sa OPEC nga mohulga sa ilang nasudnong interes.
* * *