Samtang nagpaabot kita sa madaugong pagkabanhaw sa atong Manunubos padayon ang atong pagpamalandong ug paghinulsol, ug paghandom sa pagpakamatay sa atong Ginoo, gumikan sa atong mga sala. Kay ang kalipay nga atong bation karong adlawa sa Easter Sunday mag-agad man giunsa nato pag-observe ang 40 ka adlaw nga Kwaresma, labina ang Semana Santa.
Kun kini gipaka-bali wala lang, ug kun kini atong giisip nga mga ordinary days lang, sama sa ubang mga adlaw, walay epekto alang kanato ang Easter Sunday. Sa ato pa, dili kita mabanhaw uban ni Jesus, ug magpabilin kitang gilubong sa kasal-anan.
Black Saturday, ang uban kanato, magsaulog na, mangaligo na sa dagat, ug moduaw na sa mga dapit kahilayan. Dili sila makahuwat hangtod ugma, Easter Sunday. Ambut unsay ilang gidalian?
Usa sa angayan natong palandungon mao ang pahimangno ni Manila Archbishop Luis Antonio Cardinal Tagle nga dili kita magpaulipon sa salapi, sa paglikay sa idolatry of wealth. Ang uban gud nato, sobra na kaayo ang atong pag-idolo sa bahandi. Sama niini karong panahon sa eleksyon, gipaabot nga mobaha ang salapi. Ug lagmit nagbaha na kini karon, tulo ka semana sa dili pa ang adlaw sa pagbotar. Gihandom ni Tagle ang pagluib ni Judas gumikan lang sa 30 pieces of silver. “I hope that our generation will stop this kind of betrayal wherein people are sold for materials and money,“ nagkanayon si Tagle.
Kining atong pagbaligya sa balaan natong katungod pagpili, usa kini ka dakong pagluib batok sa nasud, batok sa kapin 100 milyon ka Pilipino. Imagine, for a few hundreds of pesos, atong gibaligya ang atong ugma?
Pagkadaghan natong Judas niini? Apan si Judas magbasol ug sa kadaku ug kabug-at sa iyang gihimo, naghikog. Padayon ni Tagle: “Wealth oftentimes hides behind good intentions . Character, not money make a person truly rich. Many wealthy people are impoverished in character. In the end your character is your true wealth and it’s priceless.”
Mao kini ang angay gihinuklogan kagahapon ... Black Saturday o Sabado de Gloria. Nga dili kita magpaulipon sa bahandi, kay after all, ang atong batasan, ang atong kinaiya maoy tinuod nga bahandi.
Daghan kaayong mga adunahan nga kabus ug dunot kaayo ang mga kinaiya. Nagsinaw-sinaw ang bahandi, apan nangalisbo sa kahugaw ang kasingkasing.
Karong adlawa, Easter Sunday na. Maoy atong hunahunaon nga kun walay Easter Sunday, walay Salvation. Kay unsa may pulos pagpasakit ug pagpakamatay ni Jesus sa Cruz kun wala siya mabanhaw?
So, daku kining kasaulogan natong mga Kristohanon nga niining atong paglawig sa walog sa mga luha ug paglunang sa kasal-anan, aduna gihapon kitay paglaum nga maluwas gumikan sa paglampus sa pagpanubos ni Jesus diin iyang gibuntog ang kamatayon pinaagi sa iyang pagkabanhaw.
At least, duna untay bisa’g gamay lang nga kausaban sa atong kinabuhi ang atong nakutlo gumikan sa atong pagsaulog ug pag-observe sa mga Mahal nga Adlaw. Otherwise, walay hinungdan ang Kwaresma, ang Holy Week, ug ang Easter Sunday alang kanato.
Daghan kaayo kitang nakat-unan nga mga kahulogan sa atong pag-observe sa mga Mahal nga Adlaw, apan, kun kini ato lang gi-take-for-granted, saying ang tanan. In the end, sa kaulahian kinsa may maalkanse, ang Ginoo ba, o kita?