Sa naandang pagsabot sa mga tawo, ang tinamud mao kadtong mga tawo nga gialagaran ug gisilbihan sa kadaghanan. Gani, presensiya pa lang daan nila nakahatag na og dakong kisaw sa ilang mga dumadapig ug mga sumusunod.
Apan lahi si Jesus. Mahimong nilingkod siya ingon nga magtutudlo ug pangulo sa iyang pundok. Apan imbis magpatagad ug magpasilbi, siya nihukas sa iyang sapaw ug nihugas sa tiil sa iyang mga tinun-an nga kun buot hunahunaon ang mohimo sa ingon ulipon man.
Apan ang maong sanglitanan nagpadayag sa iyang dakong tinguha sa pagtudlo kanila nga ang kabantog diay angayan nga sukdon diha sa mapaubsanong pangalagad.
Kini nga butang nakalimtan na sa kadaghanan nato karon. Ngano man kaha? Tingali kining mosunod nga mga rason mahimong motubag ning maong tanghaga:
1. Una, daghan nato ang buot mamahimong tinamod ug alang nato way luna ang kahuyang dinhi sa atong katilingban. Ang bisan unsang huyang pagaisipon nga irrelevant o insignificant.
2. Ang principle of identification nagtukmod kanato nga kinahanglang ma-identify kita sa mga bantogan ning atong katilingban. Mao tingali nga kun dunay mga standee sa mga inila buot kitang magpahulagway tupad niini.
3. Ang kalibutan matamayon mao nga maningkamot kita paghakgom og gahum aron sa ingon mamahimong mas matabonan nato ang atong vulnerability gikan sa mga posibleng hulga ug aggression sa mga tawong bully ning atong panahon.
4. Buot kitang modominar sa uban ug kalipay nato ang mamahimong makabentaha gikan kanila.
Sa atong pagpuyo ning atong panahon karon, mahinungdanon ang pagbaton og usa ka panlantaw nga husto ug tarong. Dili man tuod makahatag og kisaw ang ginagmay ug tinarong nga pangalagad apan makahatag kini og domino effect sa mga tawo nga mohimo og maayo.
Ning paagiha nahimong mas makahuloganon ug gamhanan ang sanglitanan sa pagpanghugas sa tiil sa mga tinun-an ni Jesus kay ang maong sanglitanan nga hangtud karon nakapahimo niyang nakahupot sa bansagon nga:
“Maalagarong Hari ug Mahigugmaong Ginoo!” Walay mawala nato kun magpaubos ug labaw na nga walay pakyas diha sa pagpangalagad.