Paeta na gyud. Karong adlawa, mosaka na usab ang presyo sa mga petroleum products. Mora’g ikaupat na kini ka sagunson nga pag-usbaw sa presyo sa gasolina, krudo, gaas ug LPG.
Nagbaguod na intawon ang mga motorista ug sigurado ko nga ang mga driver og PUJ, modemanda na usab og usbaw sa pletihan.
Sayonan ka nga mga P1.75 ang pag-usbaw sa presyo sa kada litro sa gasolina, unya tag P1.50 sa diesel kon krudo.
Ang gaas usbawan usab og P1.40 ang litro ug ang LPG nga maoy gigamit sa pagpangluto, usbawan og tag P2 kada kilo.
Sayon ra man gyud unta kaayo aron mokunhod ang presyo sa petroleum products.
Unsaon, si Presidente Duterte wala gyud maminaw sa awhag sa iyang usa ka kandidato pagka-senador nga si Ilocos Norte Governor Imee Marcos nga suspensohon lagi unta ang pagpahamtang og 12 percent nga Expanded Value-Added Tax ngadto sa mga petroleum products.
Kon tumanon lang unta ni Presidente Duterte ang awhag ni Imee, tingali mohumot pa ang ilang mga kandidato sa katawhan.
* * *
Usa ka ilado ug nagpakabana nga lumolupyo sa Barangay Talamban, Dakbayan sa Sugbo, mitawag kanako ug mipahibalo nga midagsang pag-ayo ang mga illegal outlets sa Small Town Lottery (STL) sa ilang dapit.
Mitug-an nako ang informer nga ang operator sa mga illegal STL outlets, igsuon og usa ka opisyal sa barangay.
Usa sa gibasehan sa informer nga illegal ang mga STL outlets kay kon dunay makadaug, dugay kaayong makahatag sa debedendo, dili sama sa mga legal STL outlets.
Makatuo na lang sab ta nga nagdawatan ang mga polis og bahin sa kita niining maong mga operator sa illegal swertres kay wala man gyud sila’y gihimo nga pagpangronda sa mga illegal nga sugalan.
Atensyon Colonel Royina Garma, ipa-raid ni maam pinaagi sa pakigtambayayong sa PCSO.
* * *
Dili gyud kaayo daghan ang nakatambong sa PDP-Laban rally sa Plaza Independencia kaniadtong Domingo, kon itandi nimo sa mga nanglabay nila nga kalihokan nga wala ang presidente.
Abi ninyo og ngano? Daghan unta ang gustong motambong apan tungod sa estrikto kaayong security, ang uban wala na lang mosulod og namauli na lang. Una, layo pa kaayo dili na pasudlan og mga sakyanan.
Ikaduha, dunay mga gi-designate nga “entrance” ug “exit” ug ang uban layoan na kay kinahanglan pa sila nga motuyok.
Bisan ang paggawas, lisud kaayo mao nga dili gyud kaayo daghan ang nanambong.
Apan hinoon, congrats sa mga organizer kay hapsay ra ang maong kalihokan kay duna may mga puthaw nga railings nga gibuwagbuwag ang mga bisita, mga media ug mga lider sa partido.