Kun magpadayon kining giingon nga hidden pork, kun kining gitagoan nga savings sa miaging duha ka tuig, ug kining gibutyag nga mga insertions sa 2019 budget, gikabalak-an nga maka- influence kini sa resulta sa Mayo 13 nga eleksyon.
Mipahimangno niini si Camarines Sur Rep. Rolando Andaya, Jr., ang chair sa House appropriations committee. Matud ni Andaya nga sa duha ka tuig ang DBM adunay savings nga mikabat og P370 billion.
Kun tinuod man, hain ug giunsa man kini karon? Mao kini ang mga pangutana nga tingali unya og gamiton kini sa eleksyon. Hinuon walay katinuan kun makaapiktar ba gayud kini sa umaabot nga eleksyon.
Sa nahitabo, kining maong mga kabalaka bahin sa 2019 national budget, wala makaapektar tungod kay napirmahan na man kini sa Presidente. Sa ato pa, wa na to ang gikahadlokan nga re-enacted budget.
Apan nagpabilin ang isyu sa DBM savings ug ang gitawag nga pork insertions. Sa mga tambay pa: let us to see.
* * *
Ang Commission on Elections (COMELEC) mipahimangno batok sa mga survey sa social media nga may kalabutan sa umaabot nga eleksyon.
Matud ni James Jimenez, tigpamaba sa Comelec: “Some information, including poll survey results being posted on social media, may not be accurate and might in fact be meant to mislead. I would caution that surveys conducted on social media are not reliable. ”
Matud ni Jimenez, iyang namatikdan nga dunay gipang-post sa Facebook nga adunay mga wa-ilhi o mga unknown nga kandidato pagka-Senador nga nag-una sa survey, samtang nangiwit ang re-electionist nga mga Senador.
Sa akong bahin wa ko ma-problema niini tungod kay wa man ko mag-apil-apil niining Facebook ug ubang mga paukyab sa social media. Mao bitaw nga dili ko maapiktahan sa mga fake news.
Ang Comelec karong Pebrero 23, mopagawas sa hingpit nga talaan sa mga senatorial candidates. Ato kining huwaton aron kita na ang mopili kinsa kanila ang qualified gayud pag-alagad isip magbabalaud, ug dili kita maghuwat sa mga endorsement.
Apan, ang latest nga Pulse Asia Survey, nag-una gayud, at least, ang mga reelectionist, samtang ang uban, nagsunod kanila. Ug layo kaayo ang mga wa-ilhi, apan nagpaabot nga adunay milagro nga makapadaug kanila.
Ug niay kataw-anan, usa ka kandidato pagka-konsehal sa Quezon City nangapud-apod og mga underwear bearing his name. Moy gidangat! Bida, bisa’g unsa na lang gyud ang mahunahunaan sa tawo aron mudaog sa eleksyon.
Hinaot nga walay atong mga kandidato dinhi nga mosunod niining maong gimmick.