Ang rice Tariffication

Balaud na ang Rice Tariffication. Tungod niini lain-lain nga panahom ang atong nadungog gikan sa mga nagduso sa balaud ug sa mga misupak niini.

Si Senador Cynthia Villar ang Chairperson sa Senate Agriculture Committee ug usa sa mga nagduso sa Rice Tariffication law mihulagway niini nga dako og ikatabang sa pagpadako ug pagpataas sa ginansiya ug kompetensiya.

Ang administrasyong Duterte uban sa mga kaalyado niini sa kongreso miingon nga sa pagkabalaud na sa Rice Tariffication mapaabot na sa katawhan ang pag-ubos o pagbarato sa presyo sa bugas sa merkado ug ang pagka makanunayon sa baligyang bugas.

Apan lahi ang tan-aw ni Danilo Ramos ang Chairman sa Kilusang Magbubukid ng Pilipinas (KMP). Iyang gihulagway ang balaud nga sinugdanan sa kataposan sa industriya sa bugas sa nasud. Iyang giingon nga bisan pa man og dunay pundo nga napulo ka bilyon (P10B) ka pesos para sa mga mag-uuma apan kining maong pundo dili makasugakod sa magbaha na unya nga imported nga bugas sa merkado.

Ang Rice Tariffication law makaapekto kini sa sobra napulo ka milyon (10M) ka mga tawo nga nagdepende sa baratong bugas sa National Food Authority (NFA), dul-an sa biente ka libo ka mga NFA Rice Retailers ug singkuwenta ka libo ka mga Rice Mill workers.

Ang balaud nagwagtang sa limitasyon sa pag-angkat og bugas sa gawas sa nasud basta mobayad lang sila og 35 porsiyento nga taripa kun ang importers adto moangkat sa nasud nga sakop sa ASEAN ug 50 porsiyento nga taripa kun adto moangkat sa dili sakop sa maong regional bloc.

Dinhi kuhaa ang P10 bilyones nga Rice Competitiveness Enhancement Fund nga gamiton sa pagpalit og mga farm machinery aron mapaubsan ang gasto sa panguma, mahatagan og binhi ang mga mag-uuma aron mapataas ang ilang ani, mapalambo ug himuong moderno ang mga postharvest facilities, i-promote ang rice research ug inbred rice seeds, pautang ug skills development services. Makaayo ba ang Rice Tariffication Law? Atong atangan.