Kasingkasing gibugkos sa gugma

Ning buwan sa Pebrero gisaulog nato ang buwan sa kasingkasing, gani ugmang adlawa ang labing espesyal nga adlaw nga gitawag og Valentine’s Day.

Niadtong nakalabay’ng adlaw adunay 16 ka paresan sa kapolisan ang gigapos sa talikala sa gugma pinaagi sa usa ka mass wedding nga gipasiugdahan sa kadagkoan sa Police Regional Office (PRO-7).

Sagad sa mga pares dugay nang kasal sa sibil apan matod nila nga gumikan sa mga sirkumstansya wala gyud nabendisyonan sa simbahan.

Busa dako ang ilang paghangop sa kahigayonan nga gihatag kanila sa ilang regional Director Chief Supt. Dibold Sinas sa nadawat nilang sakramento sa kaminyoon nga duna kunoy blessing sa Ginoo.

Usa sa mga gikasal ang City Director sa Mandaue City Police Office Senior Supt. Julian Entoma.

Nag-uban na sila og 22 ka tuig nga gikasal sa sibil sa iyang asawa, plano nila nga magpakasal sa simbahan sa ilang anibersaryo apan duna namay kahigayonan maong gikuha nalang nila ang oportunidad sa pagdawat sa sacrament of matrimony.

Nindot kaayo sud-ongon, ma pulis man o sibilyan nga mipalig-on sa ilang gugma nga gibugkos sa sakramento.

Ang uban moingon nga ang kasal anaa ra sa papel, ang mahinungdanon kuno mao ang pagminahalay.

Bisan kapila gikasal kun dili magkasinabot wala kunoy kapuslanan kay mosangpot lang gihapon sa panagbulag.

Apan taphaw kaayo kana nga katarongan sa mga tawo nga mahadlok lang magapos sa forever kay dili pa man sila segurado.

Alang sa mga tawong nahigugma bisan kada tuig pa magpakasal o mag-renew sa ilang panumpa sa kaminyoon ok ra kay giputos man sa gugma ang ilang panag-uban ug segurado na sila sa ilang forever!