Ang kompaniya nga tighakot og basura gikan sa mga ospital sa Mandaue City wa gyud diay makakuha og environmental clearance ug sanitary permit sa miaging tuig, apan ang kagamhanan sa Mandaue mihatag gihapon og pagtugot nga makapadayon ang kompaniya sa pag-operate sa ilang business.
Resulta, nasakpan nga ang ubang mga basura nga “infectious” nga nakolekta nila gikan sa ospital, giingong gilabay ra sa Butuanon River ug sa dihang mibaha, nangaanod kini ngadto sa dagat.
Gikabalak-an nga apektado ang mga isda sa kadagatan sa Mandaue ug Lapu-Lapu City.
Kun ingon man gani niini ang sitwasyon nga gihatagan ra gihapon og provisional mayor’s permit ang maong kompaniya, bisan og wala kini makatuman sa mga gikinahanglang dukomento, klaro na kaayo kun kinsa ang angay’ng mabasol sa pagpataka paglabay sa maong mga basura nga duna pay nga dugo.
* * *
Daghan ang nagtuo nga matikas ra gihapon ang resulta sa eleksiyon bisan og mogamit pa ang Comelec og electronics counting machines sa pag-ihap sa mga botos.
Gani, usa kini sa gibasehan sa protesta ni kanhi senador Bongbong Marcos batok ni Vice President Leni Robredo. Daghan ang miingon nga mahimo gyud nga maniobrahon ang mga electronic counting machines.
Nindot ang sugyot ni Ilocos Norte Gov. Imee Marcos nga ang Comelec mo-accredit og usa ka independent nga election watchdog nga adunay mga sakop nga makamao kabahin sa pagpahigayon sa automated elections.
Pinaagi niini, makabantay sila kun adunay mohimo og pagmaniobra sa resulta sa eleksiyon ug mapugngan ang mga tikasan sa ilang tinguha modaog pinaagi sa tikas.
Hatagan unta og pagtagad sa Comelec ang nindot kaayong sugyot ni Imee Marcos. Nabalaka si Imee kay kun walay independent Comelec watchdog nga maantigo kabahin sa automated elections, kuyaw og mabiktima siya kay kandidato ra ba siya pagka senador sa eleksiyon karong Mayo.
Bisan ako dili 100 percent nga motoo nga wala gyuy tikas ang pagamit og mga electronic equipment alang sa automated elections.
Nakabasa ko sa balita sa The Freeman kaniadtong Domingo nga lima ka dugang gobernador mipasalig nga paniguroon nila nga modaog pagka senador si kanhi special assistant to the president Bong Go sa ilang dapit.
Bisan ako nagtuo gyud nga kun magsugod na ang kampanya, mosamot kainila si Bong Go, ilabi na nga matinabangon kaayo siya sa katawhan nga nanginahanglan.
Dili gyud ko mauwaw nga motug-an nga dili pa presidente si Digong niadtong 2015, ug si Bong Go executive assistant pa lang ni mayor Duterte, apan gitabangan na niya ang akong maguwang nga na-admit sa Southern Philippines Medical Center (SPMC) sa Davao City. Matinabangon gyud!