Pagkabulahan gyud sa Sugbo ug sa tanang mga deboto ni Senyor Sto. Niño tungod sa kanunay Niyang paghatag og maayong panahon alang sa tanan atol sa kasaulogan sa Iyang kapistahan kagahapon.
Bisan tuod may hulga sa low pressure area ug paghabo-habo wala gyud kini mobuylo og bunok og uwan. Daw sayod ang Balaang Bata sa kahago sa mga deboto ilabi na sa mga contingents nga mohalad og sayaw para Kaniya.
Niadto palang sa Walk with Mary, Fluvial Procession ug Solemn Procession makita gyud kun unsa kahugot ang pagsalig ug debosyon sa mga tawo kang Senyor Sto. Niño gumikan sa ilang personal nga mga kasinatian sa milagrong gihatag niini kanila.
Makita sab nga bisan og nagkalatom ang kalangitan tungod sa LPA, wa man say hubas-hubas ang agus sa mga tawo sa kadalanan dili lang sa rota sa Sinulog Grand Parade kondili hasta sa mga lagyo na nga mga dalan.
Kaniadto pa dako kaayo ang pagsalig sa mga Sugboanon ug sa mga debotos nga dili gyud itugot sa Senyor Sto. Niño nga sila mahasol atol sa pangilin niini. Kini maoy hinungdan nga bisan kadtong mga taga lagyong lugar motuyo og anhi aron pagtuman sa ilang mga panaad.
Makadaghan naman gud nga higayon nga samtang nagkaduol ang Pista Senyor aduna man say mga napormang bagyo sa kadagatan sa Pasipiko.
Ug ning mga bahina sa tuig, sagad gyud sa mga bagyo ug mga low pressure areas motadlas ra ba gyud sa Sugbu ug sa mga kanait niining mga probinsya.
Kun dunay paghabo-habo, positibo man gihapon kining gidawat sa mga tawo ug giisip nga bendisyon gikan sa Batang Hesus.
Ang Sugbu gihamok karon og mga makalilisang nga mga krimen ilabi na kining mga nahitabong mga pagpatay bugtong kadangpan mao ang pagampo nga unta hikapon ang mga kasingkasing sa mga tawong nagbuhat niini nga mahalon ang isi’g ka tawo sama sa pagmahal sa Batang Hesus.