Duna ko’y mga amigo nga mangaligo unta sa dagat diha sa Dakbayan sa Lapu-Lapu kaniadtong Domingo, apan wala na modayon.
Nakadungog sila sa abiso nga kuyaw karon kaligoan ang dagat sa Mactan.
Ang rason niini tungod sa pagkakaplag sa daghang ginamit nga syringe sa injection, mga ginamit nga dagom niadtong mga pasyente sa ospital nga may HIV ug Hepatitis.
Kinsa man gud ang dili kuyawan nga mataptan ka niining maong sakit?
Ang rason diay kay ang gitugyanan sa paglabay sa maong mga delikado kaayong basura gikan sa ospital, diha ra molabay sa Butuanon River.
Diha nga mibaha, aw ang maong mga gilabay nga basura, nangaanod sa dagat. Ang uban niini, niabot ngadto sa Mactan ug ang uban diha ra nangasangit sa Mandaue.
Tan-aw nako niini, angay’ng manubag si Mayor Luigi Quisumbing kay ang iyang mga kawani sa siyudad ug sinaligan sa Mandaue, wala makabantay sa binuang niadtong naglabay sa mga basura.
Dili ba duna may programa gani nga atimanon ang Butuanon River? Nganong nalabayan man hinuon kini og mga basura?
Usa ka reporter nga nadestino sa Mandaue, mitug-an nga ang gigastohan og dakong kantidad sa Mandaue mao ang ibabaw nga bahin sa Butuanon River, nga wala kaayo’y problema.
Gipabalita kuno nga giatiman na ang maong sapa sa siyudad, apan sa ubos nga bahin, wala pa maatiman ang problema sa paglabay’g basura sa sapa. Kadako sa kadaot nga nahimo niini mayor?
* * *
Nagkaestoryahay kami si Presidential Communications Operations Office (PCOO) Secretary Martin Andanar kaniadtong Domingo sa gabii diha nga mibisita siya sa Sugbo.
Akong gipangutana kun ngano nga bisan og walay hunong ang pagbisita ni kanhi Special Assistant to the President (SAP) Bong Go sa lainlaing dapit sa nasud, anaa ra man siya sa ika-14 nga pwesto sa popularity survey sa mga nagtinguha nga mahimong senador?
Dako ang pagtuo ni Andanar nga kun magsugod na gyud ang pagpangampanya, mosaka ra ang “popularity rating” ni Bong Go.
Diha nga bahina, nagkauyon kami si Andanar sa among baruganan. Kun makasabot na ang katawhan nga si Bong Go naglantaw gyud sa kahimtang sa panglawas sa katawhan, diha na nga mosulbong ang iyang kainila.
Ang ako lagi nga maguwang usa sa gitabangan ni Bong Go diha nga nagsilbe pa lang siya kaniadto nga executive assistant ni Mayor Rodrigo Duterte sa Davao kaniadtong Marso 8, 2015.
Dili niya kaila ang akong maguwang, kinsa tulo ka adlaw na nga diha lang ipahiluna sa emergency room.
Gipabalhin ni Bong Go ang akong maguwang sa Heart Center sa ospital ug kay pobre man gyud tawon mi, wala kami pabayra bisan usa ka sentimo, ug gipadad-an pa og mga tambal sa iyang paggawas.