Disyembre 23, 2018: Ika-upat Domingo sa Adbiyento
MGA PAGBASA: Mi.5;1-4/Sal. 80/Heb. 10;5-10/Lk. 1;39-45
Nindot paminawon ang Good News kay makahatag og kalipay sa matag usa kanato. Apan sa laing bahin, ang Good News usab intended aron mamahimong ganado ang matag usa kanato. Ang duha ka mga babaye nga sila si Maria ug Isabel ang managsamang nagmalipayon ug nag-inambitay sa Maayong Balita kalabot sa ilang tahas ingon nga mga inahan sa mga personahe nga dili kasarangan nga mao silang Juan Magbubunyag ug si Jesus. Ang maong mga anak nagdala og mga Maayong Balita sa kaluwasan alang sa mga tawo ning kalibutan nga nahimong biktima sa tiaw nga tawhanon ug sa dulom nga kagabhion sa kasal-anan/ Managsama nilang gisangyaw ang mensahe sa paglaum taliwala sa kawalay kapaingnan. Ning panahon sa Pasko sa pagkatawo sa atong Ginoo unta mamahimong atong tumong ang paghimo sa atong kaugalingon ingon nga mga mensahe sa Dios alang sa uban. Nakadawat kita og maayo ug angay lamang nga atong ipaambit ang bisan unsang maayo ug dili ang dautan.