Pangdakpon na usab sa kadalanan kaning mga mamasahero nga mag-motorsiklo human gimando sa Korte Suprema nga ilegal kining nga matang sa pagpamasahero.
Ang Korte Suprema miingon nga ilegal kaning operasyon sa Angkas nga usa ka apps-based nga pagkontrata og pasahero ug sa mga drayber sa motorsiklo nga sakop sa Angkas.
Ang rason mao nga nakalapas kini sa Republic Act 4136, o Land Transportation and Traffic Code. Ang ilang tan-aw dili luwas ang maong sakyanan aron himuong pasaheroan.
Husto ang gibuhat sa Korte Suprema tungod kay para man kini sa kaluwasan sa mga pasahero. Kinahanglang may tulubagon ang mga drayber sa motor o habalhabal sa kinabuhi sa ilang mga sakay.
Subo lang kaayo kay walay ahensya sa gobiyerno nga adunay kompletong rekord kun pila gyud ka mga aksidente matag tuig nga naglambigit sa mga motorsiklo, may kontra man o wala. May nakalas man o wala ug danyos sa kabtangan dala sa maong mga aksidente.
Kanang rekord nga dunay komprehensibong obserbasyon ug pagtuon kun ngano ug unsay sagad nga hinungdan ug kun unsa ang mga rekomendasyon aron kini mapugngan.
Apan kun ang mga balita maoy basehan, makita gyud nga matag semana adunay usa ngadto sa duha ka mga aksidenteng nahitabo dinhi sa Sugbo nga nalambigit ang motorsiklo. Nagpasabot ba kini nga dili gyud luwas sakyan ang mga motorsiklo isip pasaheroan?
Apan sa mga yanong tawo ilabi na niadtong mga nagdali kay hadlok mauwahi sa trabaho, wala na para nila ang risgo basta di lang sila ma-late.
Angay tingaling subling tun-an sa mga magbabalaod kun unsaon kini nga mamahimong legal ug luwas nga alternatibong matang sa transportasyon.
Kini tungod kay sa pagkatinuod, gawas nga makatabang sa sumasakay, makabuhi baya kini og pamilya.
Angay tingaling rebisahon ug amendahan ang Republic Act 4136, o Land Transportation and Traffic Code ug ipahaom sa panginahanglan sa bag-ong panahon kay panahon pa ni kupong-kupong kining balaora.