Unsay buhaton kon di hatagan og 13th month pay?
Dear Atty. Divine,
Usa ko ka gwardiya ug nagtrabaho sa usa ka bangko. Karon maoy ikaduha ka tuig nako nga pagtrabaho sa bangko attorney apan ubos mi sa usa ka security agency. Ang among duty kada adlaw 12 hours pero wa man mi hatagi og overtime pay. Last year wa sab mi hatagi og 13th month pay. Ang akong pangutana kun unsay among buhaton aron mahatagan mi og 13th month pay this year? Daghang salamat. — Mr. G.
Dear Mr. G,
Basi sa atong Labor Code ang usa ka trabahante gikinahanglan nga motrabaho og 8 hours per day lang. Kun mosubra na gani sa walo ka oras ang pagtrabaho then kinahanglan na nga mobayad og overtime pay ang imong employer. Samtang kalabot usab sa 13th month pay, mandatory kana basi sa atong balaod busa ang tanang empleyado kinahanglan nga makadawat og 13th month pay ug obligasyon sa kompaniya ang pagtuman niini. Kun ang employee nakaserbisyo sa tibuok tuig sa maong employer then entitled siya og 13th month pay nga equivalent sa iyang one month nga sweldo ug wa kini deduction sa tax. Apan kun katunga ra sa tuig iyang natrabahuan then katunga ra sad iyang madawat nga 13th month pay ug kinahanglan nga ihatag kini on or before December 24. Kun di mo hatagan og 13th month pay pwede mo modangop sa DOLE pinaagi sa pagpasaka og reklamo batok sa inyong security agency ug ang DOLE na ang mopatawag sa inyong agency, ilakip sab ninyo pagreklamo ang wa pagbayad og overtime pay sa inyong agency. Ayaw mo kahadlok sa pagreklamo kay inyo kanang katungod ug aron sab mahunong na kining pag-abuso sa ubang employers ngadto sa ilang mga trabahante. Thanks and God bless. — Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St. , Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest