Kulang sa political will
SAKSAK SINAGOL - Lucky Malicay (Banat) - December 5, 2018 - 12:00am

Nagsugod na usab og kuyanap kining mga manaygonay sa karsada dinhi sa Sugbo.

Kining maong mga manaygonay mao ra kadtong mga naglatagaw sa kalye nagsige og pakilimos sa mga motorista ug pasahero sa jeepney.

Tungod lagi kay grabe na ang pagpangalisbo sa espirito sa Pasko, misakay na sa panahon kining mga batang libudsuroy ug nakakita og maayong pangwarta niining panahona.

Ug kini mao ang pagpanaygon sa kadalanan.

Hinuon dili lamang mga batang kalye ang kugi sa pagpanaygon karon.

Anaay mga dagko usab nga mokalit lang og sakay sa mga jeepney ug dayong sing-al og mga Christmas song ngadto sa mga pasahero.

Apan ang nakaparat usab niining mga manaygonay, mga bata ug dagko, mao nga mahimo usab silang bayolente usahay.

Kini ilabina kon ang mga pasahero sa jeep ug mga motorista ang magdumili paghatag og sinsilyo.

Daghan nang mga kaso diin ang mga pasahero ug motorista pasakitan sa mga manaygonay gumikan sa ilang pagdumili paghatag og kwarta.

Dili usab makasukol ang mga biktima kay hadlok lagi nga tabangan usab sa mga manaygonay.

Usa usab sa nakapaisog sa mga batang libudsuroy mao ang mga sindikato nga ilang gisandigan.

Gigamit sila niining mga sindikato kinsa maoy mo-deploy kanila sa kadalanan aron pagpakilimos ug manaygon.

Ambot bitaw ngano nga wala gyuy  nahimo ang otoridad paghinlo sa kadalanan gikan niining mga libudsuroy.

Hagbay ra silang nagbahis sa kadalanan ug sige nga pamiktima sa publiko, ilabina sa mga langyaw’ng turista.

Hagbay rang sige og pahimangno ang otoridad sa katawhan sa dili paghatag ug salapi niining mga libudsuroy ug manaygonay tungod kay gidili kini sa balaud.

Apan sila mismo kulang sa political will paggukod niining mga batang kalye.

Hangtud nga dili manghingusog ang kagamhanan batok sa mga libudsuroy ug mga street dwellers nga naghatag lamang og hugaw nga imahe sa Sugbo, dili gayud masulbad kining maong problema.

POLITICAL WILL
Philstar
  • Latest
Latest