Makulang man o manubra ang tubig sa lawas, pulos aduna kini negatibong epekto sa atong panglawas, ilabi na nga dili kaayo kita metikuloso sa atong kahimsog. Igo na lang ta nga mahingangha kun mangasakit na.
Ang tubig sa lawas, gikinahanglan nga dili mapundo’g dugay, aron kahulipan kini og bag-ong tubig. Ang nahibilin nga nanubrang tubig, kadugayan mahimong toksik o makahilo na kini sa lawas. Maglipay ang ‘free radikals, nga sakiton ang lawas sama sa ginganlag ‘Edema’ (water retention).
Sakit kini nga sa sinugdanan morag gi-allergy nga mangatol ang lawas. Kon di dayon matagad, kadugayan manghupong ang panit nga sinawon ug mamula, nga usahay himbison. Dili lalim nga mag-antus aning sakita, kay apektado ang tibuok nga parte sa atong lawas, nga tandogonon nga mosakit inig lihok.
Ang sakit nga ‘edema’ (water retention), tungod sa toksik o bahaw nga tubig, depektuso nag sirkulasyon, nga wala nay katakos makasuplay og igo nga hangin ug dugo aron gamiton nga enerhiya.
Mao nga hasta sa sud sa mga tisyus ug mga ‘cavities’ nga makagabok sa bukog, moresulta sa panghubag o panakit sa tiil, sa tuhod, kamot ug ang batiis nga di na kasugakod hangtud mabakang ang linaktan.
Daghang hinungdan ngano nga naingon ini, nga ang nanubrang tubig nga dugay nagpundo sa lawas (water retention o edema), nahimong makahilo sa lawas. Hinuon sintomas sab ni sa grabeng medikal nga kondisyon, sama sa sakit sa pantog o sa kidney.
Apan niadtong dili kaayo aktibo sa kalihokan ug way paugnat o ehersisyo nga gimbuhaton , mahimo sab nga apektado niini. Kon nakasinati kana ini, ayaw dugaya nga magpahiling dayon sa imong doktor.