Gipahibalo sa gobiyerno nga may nakadaog na sa bidding sa ikatulong telecommunications company (telco) aron mamahimo na kining tulo ka higanteng communications provider dinhi sa nasud.
Matud pa nga kun tulo na ka mga dagkong kompanya ang magkombate dili na ma-monopoliya sa PLDT-Smart Telecommunications ug Globe Telecommunications ang merkado sa mobile ug internet.
Hinuon sigurado gyud nga kon makabuwelo na ang maong ikatulong telco company mobarato usab ang singil sa internet ug ang labing gipangandoy sa publiko nga paspas nga internet service sa nasud kay magkompetinsyahay naman ni silang tulo.
Kon kaniadto gibahin ra sa duha ka telcos ang mga parokyano, karon tulo na silang magbahinbahin, sigurado gyud nga ang usa dili mosugot nga mapunta sa bisan asa sa duha ang kustomer.
Apan dili pa angay maglumpayat sa kalipay ang mga konsumidor, kini tungod kay dili ingon niana kadali ang pagtukod sa mga gikinahanglang imprastraktura sama sa mga cellsites.
Mahuman nalang ang termino ni Pres. Duterte dili pa gyud masakop sa maong bag-ong telco ang tanang mga lugar sa nasud.
Kon buot hunahunaon, ang Smart ug Globe gani wala pa gyud hingpit nakakompleto sa tanan nilang gikinahanglang tukoron ang mga cellsites bisan og gibanabanang kapin 20 ka tuig na sila gikan sa ilang pagsugod.
Magunsa naman lang kining ikatulong telco?
Dakong problema sa mga telcos ang pagkuha palang og mga permits gikan sa mga Local Government Units, managlahi usab ang mga presyo sa mga luna nga tukoran sa cellsites.
Way kwestyon ang katakos sa China Telco nga makapatukod og imprastraktura apan siguradong anhi gyud sila maglisod unya sa pagkuha sa mga gikinahanglang permits bisan pa man og may bendisyon pa sila gikan sa presidente tungod kay maon man usab kini ang nahitabo sa mga nagunang telco companies.
Laing pangutana, unsaon man kaha pagbawi sa ikatulong telco ang ilang nagasto sa mga imprastraktura, dili ba kaha gikan sa mga kustomer?