Bisag unsa kalimpyo ang bisti o senina nga atong isul-ob sa panahon nga duna kitay tambongan nga kalihokan o sa inadlaw nga kaakohan sa trabaho, apan may makitang mantsa niini, mao dayon kini ang makilatis sa nagtan-aw kanato. Kalagmitan masaypan kita sa ilang hunahuna nga yanghag o hugawan.
Busa kon aduna tay paborito nga bisti labi nag bag-o pang urog, ampingi nga di kini mamantsahan. Apan lagi ang higayon maayo kaayo nga mosungog nga di ta kamatngon nga ig-uli nato igo na lang ta sa paglingolingo kay namantsahan na ang bag-ong pinalit nga ukay-ukay.
Hinuon naay daghang produkto ini aron pagtangtang sa lama o mantsa, nga sagad hinimo gikan sa asido nga sinambogan og pahumot aron pagneutral sa kaisog hanggapon ang baho ini. Gawas pa, makadismaya ang epekto ini kay makagabok ni ug maklaro gihapon ang amag sa mantsa.
Mas maayo ang produkto sa kinaiyahan ang atong himuong panangtang sa lama sa atong mga paboritong igsusul-ob. Diin sayon ug praktikal ra kini gamiton, gawas nga makadaginot ka pa. Ania atong diskubrehon ang epektibo ug natural nga mga panangtang sa lama o mantsa, sama sa mga mosunod;
* Lemon juice — Kini maoy gamiton sa mantsa gumikan sa nagdalag nga lama sa singtanom labi nag asidik ang lawas kadugayan molagom (dark yellowish) ang sidsiran, kuwelyohan o sa liab sa dughanan. Kon kanunay ta magsul-ob og puti, ingon gyud ini maklaro madugayan ang mantsa sa singot nga lisud na tangtangon.
Pasalamat ta sa lemon juice kay mao lay makalimpyo ini nga di madaut ang bisti mo. Butangig diotay nga tubig ang juice, unya paghiran ang lama nga nusnosan pag-ayo. Anti-bakteryal ang duga ini nga paputi sa bisting nilagom.