Adlaw karon sa mga santos, kun All Saints’ Day. Ugma, maoy gitawag og adlaw sa mga kalag, kun All Souls’ Day.
Ang ubang mga tawo, ilabi na kadtong tua sa mga hilit nga dapit sa mga lungsod, motawag niini og “Kalag-Kalag.”
Matud sa usa ka pari nga sayop kining maong termino kay nganong tawgon man kuno og kalag-kalag, kon mao na dili gyud diay kuno tinuod nga adlaw sa mga kalag?
Na, buyno, wala pa gayud mausab ang batasan sa kadaghanang mga tawo nga moadto lang sa mga menteryo ug manglimpyo sa lubong sa ilang mga minahal inig-abot niining mga adlawa.
Kada adto nako sa lubong sa akong mama ug papa, makahinuktok gyud ko.
Unang namatay ang akong inahan kaniadtong 1996, ug mga 10 ka tuig nga magkuyog kami ug ang akong papa pagbisita sa iyang lubong kada Nobiyembre 1.
Apan niadtong 2006, namatay na usab ang akong papa. Samtang magtutok ko sa ilang lubong nga giusa na lang ang ilang mga bukog, makahanduraw gyud ko sa higayon nga magtupad kami si papa kaniadto sa pagbarug atubangan sa lubong ni mama, ug magdungan sa pagpangadye.
Ingon gyud niana ang kinabuhi. Swerte hinoon sila si papa ug mama kay anaa man ang ilang mga anak nga maghunahuna gyud sa pagpasuga sa ilang lubnganan inig-abot sa Nobiyembre 1.
Anaa usab ang akong kapikas nga mobutang og mga buwak ug molitok og mga pulong sa pag-ampo.
Makatuaw ko sa hilom. Ako kaha no kon moabot na sa higayon nga moapas na nila ni mama sa laing kalibutan, may molitok ba usab kaha og pulong sa pag-ampo para kanako?
Subo kaayo nga duna gani mga anak nga tungod kay gipasagdan ra man nila ang mga lubong sa ilang mga ginikanan, dili na sila makatultol kon hain kini mahimutang. Subo kaayo kini nga hunahunaon.
* * *
Daghan na kaayo ang natabangan sa Malasakit Program ni Presidente Duterte.
Sa Vicente Sotto Memorial Medical Center lang, kapin na sa 53 mil ka pasyente ang nakapahimus niini, hapit na mahurot ang unang P50 milyones nga gigahin sa presidente para sa maong medical program.
Nakahigayon kami sa pagpakighinabi ni VSMMC Director Gerardo Aquino atol sa press conference didto sa maong ospital kaniadtong Martes sa gabii.
Moadto man gud unta sa ospital si Special Assistant to the President Bong Go nga maoy nagdumala sa mao nga medical program.
Gihulagway nila nga daghan ang nakabenepisyo niini, apan base sa pagpasabot ni Dr. Aquino kon unsaon sa pagpahimus sa maong medical program, gikutihan ko.
Apan unsaon, kon wala kay kwarta, aw, mag-antos lang gyud.