Command of responsibility

Ang prisohan hugot gibantayan sa mga jail warden ug jailguards.

Sama sa naglihok nga tiktak sa orasan, ilang mga mata gianad nga dili matulog sa oras sa ilang pag-alagad.

Kauban nila pirme mga armas pagmonitor sa mga lihok sa misulod-gawas mga dalaw ug labaw sa tanan, sa mga  priniso, kinsa sagad mga kriminal ug nahilambigit sa dakong sindikato sa illegal drugs nga abi ni Pres. Duterte og mahanaw sulod lamang sa unom ka bulan nga pakiggubat, apan hangtod karon daw sakit nga kanser, diin bisa’g giunsa’g tira og chemo kada adlaw, ingon sa wala na gyuy paglaom nga maalim.

Makakutaw sa utok ang pagpunay’g hunahuna. Nganong adunay polis nga gipatay ra sab sa mga polis sulod ug gawas sa atop?

Nganong naay mga heneral nga naapil sa listahan sa mga druglords ni Duterte nga sila man unta ang tighipos sa mga sagbot sa katilingban.

Nganong wala man masulbad kining matanga sa kamandag niadtong saha pa, diin sayon ra untang ibton?

Nganong napasagdan kaha, hangtod milipang ug nangatakdan ang mga dagko sa atong nasod, kinsa nahimong mga kamandag usab?

Nganong makalusot-sulod sa prisohan ang mga cellphones ug mga gidiling drugas nga gibantayan man ang sulod ug gawas sa mga armadong nagguwardiya? Natulog ba diay si San Pedro dihang miagi si Satanas sa iyang tungod?

Ang pagmantala sa nasakmit nga mga armas ug illegal drugs gikan sa selda sa inmates kada greyhound inspection, dili angay ipasigarbo sa kapolisan kay naghatag lang kinig ideya nga ang wardens ug jailguards wala makaila unsay command of responsibility?

Kay kon nasayod pa sila nga kutob sa makalusot nga gidiling butang diha sa balwarte nga ilang gibantayan, ilaha kining tulubagon, segurado gayod, magbantay sila nga ang nahitabo makausa, dili na mausban. Ambot, nganong dili gyud mawala ang shabu sulod sa mga prisohan?

Gisilotan gyod kaha silang nagpabaya sa ilang trabaho, o gibalhin lag laing dapit? Tsip, tug-ani mi’s tinuod, bi!