Dihang niuyon si Cebu Archbishop Jose Palma sa pagpadayon sa iyang palasyo sa duha nga nakalingkawas sa pagpamusil sa bukirang barangay sa Malubog sa Dakbayan sa Sugbo, natubag ang dagko uyamot nga mga kahingawa:
• Ang nagbuntaog nga kahadlok sa mga biktima ug sa ilang mga pamilya sa ilang seguridad kon mosukwahi sa tanyag sa kapolisan pagkustodiya nila; ug
• Ang kalibog sa Commission on Human Rights (CHR) ug sa Cebu City Hall unsaon pagpanalipod ang mga biktima kon tinuod nga mga polis ang nisuway sa pagpatay nila niadtong Huwebes sa kadlawon.
* * *
Ang pagpili ni Sharmaine Puran sa Archbishop’s Palace inay sa proteksiyon nga gitanyag mismo sa labing taas nga opisyal sa kapolisan sa Sugbo ug Central Visayas, dakong sagpa ni Chief Superintendent Debold Sinas.
Nadugangan ang nagkataas nga listahan sa pataka niyang mga pangangkon dihang nagsige siya og balikbalik atubangan sa mga sakop sa media sa Sugbo, human nagyampungad uban sa iyang mga sakop sa Cebu City Medical Center (CCMC) sa niaging mga adlaw, nga niuyon na ang duha ka biktima sa pagpamusil sa Malubog sa pagpaubos sa kustodiya sa kapolisan.
* * *
Gipamatud-an ni Arsobispo Palma ang kaisog sa pagbarug batok sa extrajudicial killings (EJKs) sa paghangop sa posibleng labing unang buhi nga mga saksi sa laktod nga mga pagpamatay nga nihamok sa Sugbo ug sa nasud sa niaging kapin na sa duha ka tuig.
Hingpit ang suporta sa Artsidyosisis sa Sugbo sa kampanya batok sa drugas pinaagi sa mga programa sama sa Surrender to God (SuGod) Recovery and Renewal Program.
Apan kinahanglang ipasubay sa balaod ug tahuron ang kabalaanon sa kinabuhi.
* * *
Mahimong natubag nang Oratio Imperata nga gitakda ni Arsobispo Palma batok sa EJKs: “Langitnong Amahan, tinubdan sa kinabuhi ug sukaran sa kalinaw, kaming imong mga anak nasubo, nahingawa tungod sa sunod-sunod nga pagpatay sa among mga igsoon.
“Nangiliyupo kami kanimo: pukawa ang hunahuna sa wala magpakabana, samoka ang tanlag sa nagpasiugda, kablita ang kasingkasing sa mga miuyon, hupaya ang dughan sa mga naguol.
Hatagi kamig kaisog pagsupak sa mga dautan, pagbuhat og maayo, ug pagsalikway sa mga hiwing pamaagi.
Panalipdi kami sa mga bakak sa yawa, ug palingkawasa ang among nasud sa gahum sa dautan.”
* * *