Daghan nang kaso sa patay dinhi sa Sugbo nga gilambigit ang kapolisan gawas sa lehitimo nila nga mga operasyon.
Gikan niadtong suway nga pag-ambush ni konsehal Jessielou Cadungog sa Tejero ug sa pagpatay sa usa ka ahente sa Philippine Drug Enforcement Agency nga si Rian Tecson didto sa Carcar diha pay laing mga kaso sa patay nga gidudahan gihapon nga polis maoy nalambigit.
Ang labing awahi mao ang nahitabo didto sa Barangay Malubog niadtong Huwebes sa kaadlawon diin lima ka mga tawo napalgang patay.
Luwan sila sa usa ka van ug duha ka motorsiklo. Matud sa kapolisan gipatay ang maong mga tawo sa posibling ilang katransaksiyon sa drugas.
Dili imposible nga kini maoy tinuod nga nahitabo. Apan nitumaw ang seryoso nga pasangil gikan sa nangangkong duha ka mga survivors sa maong pagpamusil. Sila si Antonio Belande ug Lorraine Puran nangangkon nga uban sila niadtong lima nga napalgang patay didto sa bukirang barangay.
Gidakop kuno sila sa mga polis didto sa Guadalupe ug gidala paingon sa Malubog nga tinaptapan ang mga mata ug ginapos ang mga kamot.
Si Puran miingon nga pag-abot sa bukid gipasakay sila sa puti nga van ug girakrakan.
Nakalingkawas siya tungod kay mihapa siya ilawom sa lingkuranan ug iyang gipatiran ang tawo nga miduol aron unta siya tiwasan.
Dali kuno siya nga milayat sa pangpang ug mitago sa baga nga sagbot hangtud nga nihayag.
Apan lahi ang pangangkon ni Belande kay matud niya niingon kuno ang mga nagdakop nila nga siya maoy unahon pagpusil kay siya maoy dako nilang tanan mao nga misutoy siya og dagan layat sa pangpang.
Unsa may tinuod gikarga sila sa van ug girakrakan o gitagsa-tagsa pagpusil?
Nagsungi man ang ilang pangangkon, apan nagpabiling seryoso ang ilang pasangil batok sa kapolisan nga makapabalaka sa publiko.
Angayan nga himoon ang pakisusi sa maong mga pangangkon. Ug husto ang mga panawagan nga angayang di manghilabot ang kapolisan sa imbestigasyon ug pasagdan nga laing ahensiya ang mosusi sama sa National Bureau of Investigation.
Lisud hukman ang kapolisan tungod kay mismong ang mga nangangkong survivors wala man makaila sa mga midakop nila. Ang patas nga imbestigasyon makatabang aron paglimpiyo sa imahen sa kapolisan taliwa sa mga pagtahap nga sila maoy nagpasiugda sa mga nahitabong patay dinhi sa Sugbo.