Dear Atty. Divine:
Duna koy na-inherit nga yuta gikan sa akong mga ginikanan apan dili titulado ang maong property. Ang akong gikuptan mao lang ang tax declaration. Gusto unta nako nga patituluhan ang maong property.
Ang akong pangutana kon unsay angayan nako nga buhaton aron mapatituluhan kini. Kon ako kining aplayan sigurado ba kining maaprobahan? Daghang salamat. — Lyca
* * *
Dear Lyca:
Sa dili pa nimo aplayan og title ang imong na-inherit nga property mas maayo nga imo unang sutaon ang classification niini kon kini alienable and disposable ba og adto kini nimo subayon sa Community Environment and Natural Resources Office kon Cenro sa DENR. Kon alienable and disposable ang classification niini so pwede nimo aplayan og title sa Cenro.
Adunay list of requirements ang Cenro nga kinahanglan nimo nga i-comply ug usa na niini ang pagpa-survey sa property ug pagpa approved niini. Kon imong ma-comply ang tanang requirements, then dako og posibilidad nga maaprobahan ang imong application ug ma-isyuhan ka og title. Apan kon dili gani alienable and disposable ang property tungod kay kini watershed, timberland o forest land, then dili gyud ikaw maka-apply niini og title. Thanks and God bless. — Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkukes, Sabado ug Domingo.