Daghang kinabuhi ang nakalas sa dihang naningil ang kinaiyahan sa tungod lagi sa pagkaupaw sa atong kabukiran. Ug kining sunodsunod nga mga trahedya hinaut nga magsilbi nga leksiyon kanato tungod sa atong pagpanamastamas sa atong kalikupan.
Unang nahitabo mao kadtong pagdahili sa yuta didto sa usa ka minahan didto sa Itogon sa lalawigan sa Benguet niadtong pagtadlas sa bagyong Ompong didto sa northern Luzon sa niaging semana.
Daghan ang natabunan ug namatay sa maong trahedya.
Ug niadtong Huwebes sa buntag, nakurat ang tanan sa dakong taho mahitungod sa halapad nga pagdahili sa yuta duol sa usa ka quarry site didto sa duha ka barangay sa siyudad sa Naga dinhi sa Sugbo.
Daghan ang patay niadtong maong trahedya. Hangtud karon, daghan usab ang wala pa igkita. Ug liboan usab ka pamilya ang anaa karon sa mga evacuation center tungod kay dili na sila makauli sa ilang pinuy-anan nga natabunan sa pagdahili sa yuta.
Niining maong mga ngilngig nga panghitabo, kinsay atong mabasol?
Di usab kita makabasol sa mga biktima tungod kay anaa man sila nanginabuhi sa maong lugar. Demalas lamang sila niadtong tungora tungod kay sila ang natungnan sa maong trahedya.
Sa nahitabo didto sa siyudad sa Naga, klaro nga nagkulang ang kagamhanan sa ilang pahimangno ngadto sa mga molupyo didto sa quarry site. Kay kon aduna pay evacuation nga gipatuman ang kagamhanan, wala untay kinabuhi nga makalas sa maong pagdahili sa yuta.
Sa wala pa ang maong trahedya, aduna na kunoy mga liki sa yuta nga namatikdan ang mga lumolupyo. Ug ila na usab kuno kini nga gi-report ngadto sa lokal nga kagamhanan ug mga ahensiya sa gobiyerno.
Apan dakong tanghaga ngano nga kulang sa konkreto nga aksiyon ang otoridad.
Kinahanglan nga adunay manubag sa maong insidente. Kinahanglan nga makakab-ot og hustisya ang mga biktima sa maong trahedya. Ug nga hinaut nga magsilbi kini nga leksiyon ngadto sa tanan nga kinahanglan nga dili gayud kita magmika sa pagpangandam batok sa katalagman.