Dear Atty. Divine:
Duna koy gipalit nga property apan naa sa interior nga portion.
Plano unta nako nga tukoran og balay apan ang akong problema mao ang agiaanan kay pulos man gikoral ang balay sa mga nagpuyo palibot sa akong property.
Ang akong pangutana kon maka-demand ba ko og road right of way sa tag-iya sa atubangan sa akong yuta kay wa man koy laing agianan padung sa gawas? Daghang salamat. — Donald
* * *
Dear Donald:
Kon wa kay laing agianan paggawas sa imong property, maka-demand gyud ka og road right of way sa tag-iya sa atubangan sa imong yuta.
Mas maayo nga imong i-settle daan ang imong agianan sa dili pa ka motukod og pinuy-anan sa imong yuta aron pagsiguro nga naa kay kaagian unya.
Ang una nimong buhaton mao ang pagpakig-estorya sa tag-iya alang sa imong tinguha nga road right of way. Kon magdumili siya sa paghatag sa imong hangyo nga agianan mamahimo nga imo siyang pasakaan og reklamo sa barangay. Kon di mo ma-settle sa barangay then modangop gyud ka sa korte.
Hinuon base sa mga nahaunang desisyon sa Korte Suprema ang tag-iya sa yuta mapugos gyud sa paghatag og road right of way kon wa nay laing agianan padung sa highway ang iyang kasikbit apan obligado usab ang nag-request niini nga mobayad sa owner tungod sa iyang paggamit sa maong property isip agianan.
Mas maayo nga aduna gyuy pinirmahan nga kasabutan sa Road Right of Way ang matag habig og ipa-annotate sa title or tax declaration ang ilang kasabutan aron pagsiguro nga dili gyud masirad-an ang maong agianan bisan kon lahi na ang manag-iya niini. Thanks and God bless. — Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.