Gihunahuna nako pag-ayo kon angayan ba nga si Presidente Rodrigo Duterte mo-resign sa iyang katungdanan.
Ang nakab-ot nako nga baruganan mao nga angay’ng mopadayon siya pagdumala sa atong nasud.
Sa eleksyon niadtong 2016, mas pabor ko nga si Mar Roxas maoy mahimong presidente kay ekonomista ug daghan kaayo’g nahimo diha nga usa pa kini ka senador.
Apan paglingkod ni Duterte sa katungdanan, diha pa nako naamgohi ang kadako diay sa panginahanglan nga si Duterte maoy mangulo sa atong nasud.
Tinuod, wala kaayo mohisgot og mga economic issues si Duterte sa iyang mga pakigpulong. Kanunay lang nga isyu sa drugas ang iyang gibalikbalik.
Apan sa kadaghan na sa mga nadakpan nga drug personalities ug napatay ang mga opisyal nga kaniadto maoy gikahadlokan, diha ko nakaingon nga nagkinahanglan kita og tawo nga sama ni Duterte.
Daghan na nga presidente ang milabay, apan ang problema sa ilegal nga drugas milipang hinoon imbes mapuo. Karon, ang mga kritiko ni Duterte moingon nga bisan og daghan ang napatay apan wala gihapon mapuo ang drugas.
Natural, dili gayud mapuo pagdali ang ilegal nga drugas tungod kay daghan pa sa atong mga opisyal sa kagamhanan ug mga tinugyanan sa balaod nga nalambigit niini.
Hunahunaa kuno ninyo pag-ayo. Kinsa man ang mga opisyal sa kapolisan nga mobangga sa pamilya nga Parojinog sa Ozamiz City kon ang presidente dili isog nga molaban kanila?
Dinhi sa ato sa Kabisay-an, kinsa’y nahibawo nga mikatap na diay pag-ayo ang drugas sa Leyte pinaagi mismo sa mayor sa Albuera ug sa iyang anak nga si Kerwin.
Nabulgar ba kaniadto dinhi sa Sugbo nga may drug lord diay nga Franz Sabalones? Diha na kini nabulgar pag-ayo paglingkod na sa katungdanan ni Duterte.
Dili pa kita makaingon nga si Peter Lim nalambigit gyud sa negosyo sa ilegal nga drugas, apan may kaisog ba ang kapolisan sa paghimo’g lakang ni Lim kaniadto?
Magkurog kaniadto ang mga polis ug ubang tinugyanan sa balaod basta makadungog na sa ngalan ni Peter Lim, apan karon sa administrasyon ni Duterte, nalutsan na og warrant of arrest si Lim.
Nindot kini nga kalamboan kay dili ikalimod nga daghan gyud ang nagduda nga tinuod ang pagduda nga si Lim, nalambigit sa drugas.
Pinaagi sa hukmanan, mahimong malimpyohan ni Lim ang iyang ngalan kon dili man tinuod nga siya drug lord.
Usbon nako, angay nga si Duterte mopadayon sa iyang katungdanan.