Mas mahinungdanon ang safety sa mga tawo kay sa imahen sa world class airport nga bag-o lang giablihan.
Mao kini ang gipanghimug-atan ni Atty. Steve Dicdican ang General Manager sa Mactan Cebu International Aiport (MCIA) tungod sa gikatakdang pag-ayumayom sa runway sa airport.
Sayo niini gipadayag ni DOTR Secretary Arthur Tugade nga anaa pa sa taas nga pagsaulog ang mga tawo tungod sa pagdayeg nga naangkon sa katukoran sa gibansagan nga world class airport ug dili haum o wala sa timing ang pag-repair sa runway nga unang gitinguha sulod sa walo ka oras.
Apan nahukman sa MCIA nga ipadayon gihapon ang runway repair sulod lang sa unom ka oras diin walay tugotan nga makalupad nga eroplano niining mga orasa gikan sa alas-2 sa kaadlawon hangtod sa alas-8 buntag.
Matud ni Dicdican nga makamugna gyud og kahasol sanglit maapektohan man ang dili moubos sa 80 ka flights nga madelatar o makanselar.
Apan masinati lang kini sulod sa tulo ka semana nga maoy gitakda nga project completion gikan sa Septiyembre 1 hangtod sa Septiyembre 21.
Gipasabot sa MCIA official nga 2005 dihang na repair ang runway ug gikinahanlan na usab nga sapawan na kini’g aspalto kay duna nay mga gagmay’ng libaong nga peligro kaayo sa mga eroplano.
Daghan na usab kaayo og balas ang runway nga mahigop sa makina sa eroplano nga posibleng makamugna og problema nga dili gyud masolusyonan simbako kon mapalyar kini sa kahanginan.
Bahala na og mahasol basta maseguro lang ang kaluwasan sa mga tawo nga moagi sa tugpahanan.
Sunod nga target sa MCIA ang paghimo og laing usa ka runway nga magamit sa mga eroplano ilabi na kon dunay himuon nga pag-ayumayom.